Lubhalwe ngu-Anita Dangazele
UBrown Mogotsi uwamemezele ngaphambili amacala amathathu enkantolo, okuhlanganisa namacala amabili okushaya ngenhloso yokulimaza, adonsa iminyaka emibili ejele.
UMbuso uveze ukuthi uMogotsi unamacala ayisithupha esewonke. Abammeli bakhe baphikise ukuthi lawa amathathu angavezwanga kube iphutha hhayi ngoba bebezama ukuwafihla.
UBrown Mogotsi ungene eNkantolo yeMantshi yaseGoli wamemezela ukuthi unamacala amathathu adlule. UMbuso utshele inkantolo ukuthi unamacala ayisithupha.
Lawa amathathu uMogotsi awadalulile abucayi. Amabili awokushaya ngenhloso yokulimaza. Elinye elokushayela budedengu. Kulawo macala udonse iminyaka emibili ejele wadedelwa ngoshwele.
Lawa amathathu angadalulwanga awakacaci. Ummeli wakhe, uNthabiseng Mohomelo, utshele inkantolo ukuthi uMogotsi ukholelwa ukuthi ubale amacala angazange aholele ekutheni kulengiswe isigwebo,hhayi ukuthi uwashiye ngaphandle ngenhloso.
“Ngicela inkantolo ukuthi ibheke ukuthi umenzi wesicelo ungumuntu futhi naye uyawenza amphutha,” kusho uMohomelo.
Ummeli wesibili, uSekgatja, utshele inkantolo ukuthi amacala okushaya asukela eminyakeni eminingi edlule, ngesikhathi uMogotsi esemncane. Uphinde wathi ukugcina uMogotsi esitokisini kuzolimaza umkakhe nezingane ezine, zonke ezithembele kuye ngokwezimali.
Inkantolo iphinde yalalela izinsolo zokuthi uMogotsi wazama ukugwazela umphenyi wakhe. Ithimba lakhe labammeli likubize ngephutha.
UMogotsi ubhekene namacala ahlobene nelokuzama ukubulala, ukuqamba amanga, ukuphula umthetho, ukutholakala nesibhamu nezinhlamvu okungekho emthethweni, nokuqhumisa isibhamu esidlangalaleni.
Isinqumo sebheyili sihlehliselwe umhlaka-4 kuNhlangulana ka-2026.
Esithombeni esingenhla: Ozibiza ngomxazululi wezepolitiki uBrown Mogotsi uvele eNkantolo yeMantshi yaseGoli ngoLwesine ukuze azolalela isinqumo sebheyili esihlehliselwe umhlaka-4 kuNhlangulana ka-2026.
Umthombo wesithombe: @tndaba/X