Ingqalabutho yomculi (93) isakwazi ukujabulisa abalandeli 

Lubhalwe ngu-Everson Luhanga

Umculi wodumo wase-Malawi uGiddes Chalamanda (93) usakwazi ukujabulisa abalandeli bakhe ngomculo wakhe omnandi.

UChalamanda odume ngelika-Agide okuyigama elikhombisa inhlonipho kumuntu omdala liphinde libe isifinyezo segama lakhe, useneminyaka engu-75 esendimeni yomculo.

Waqala ukwenza umculo eneminyaka engu-12 ubudala, kodwa kudingeke alinde iminyaka engu-90 ukuze athole impumelelo ngengoma eshisa izikhotha ethi “Linny”.

NgeSonto, uGiddes ugubhe usuku lwakhe lokuzalwa lweminyaka engu-93 ngokuthola imiyalezo eminingi ebivela kubangani bakhe, abalandeli, nabanye osaziwayo kulo mkhakha.

Uqophe ingoma eshisa izikhotha emhlabeni wonke ethi “Linny” ngesikhathi eneminyaka engu-70 ubudala. Ingoma, i-mashup enomculi osemusha uPatience Namadingo idume ku-TikTok ngonyaka odlule, yazuza ukuthandwa kakhulu izigidi zabantu.

Leli culo liphinde lazuzisa uChalamanda ithuba lokuhamba enandisa ngomculo wakhe kulo lonke elase-Malawi nakwamanye amazwe aseNingizimu ne-Afrika, okubalwa kuwo elakuleli, i-Zambia, ne-Mozambique.

Uke wahambela elakuleli ngonyaka odlule wajabulisa abalandeli baseKapa naseGoli njengoba wayebhukhelwe ukuthi acule khona.

Ngemuva kokuzuza izinga elithile lodumo nengcebo ekugcineni ufeze iphupho lakhe.

Engomeni yakhe i-“Linny”, ucula athi “If I only had money, I would travel to America”  muva nje ukwazile ukwenza lokho!

Abaculi bakuleli, Philippines, nase-Canada balenze kabusha leli culo okuthiwa likhuluma nemiphefumulo yabantu abalilalelayo.

I-“Linny” iqanjwe ngendodakazi yakhe ayincoma engomeni ngokuba indodakazi enothando nelalelayo.

Ngosuku lwakhe lokuzalwa ehlanganisa iminyaka engu-92, uChalamanda nendodakazi yakhe uLinny bebeyizimenywa ezihlonishwayo e-Malawi State House, kanti bamenywe nguMengameli wezwe uLazarus Chakwera enkabeni yedolobha i-Lilongwe. UMengameli unikeze le ngqalabutho yomculo indondo kanye nesipho sosuku lokuzalwa.

UChalamanda uphinde wahlonishwa ngendondo ye-Lifetime Achievement ku-Maso Awards ngoLwezi nyakenye.

Osesithombeni esingenhla: UGiddes Chalamanda.

Umthombo wesithombe: Malawi24

Izihloko zakamuva