Lubhalwe nguDoreen Mokgolo
IMeya yoMkhandlu uNkosindiphile Xhakaza usesebenzise izindlela zokuthuthukisa ukusebenza kukamasipala ngomzamo wokubuyisa isithunzi socwaningo lwezezimali eDolobheni lase-Ekurhuleni.
Umasipala awenzanga kahle ekucwaningweni kwamabhuku ngonyaka wezimali ka-2023-24, ngombiko woMcwaningi Mabhuku-Jikelele okhomba ukusetshenziswa okungagunyaziwe, okungahambisani, nokumoshwa kwemali.
Ungomunye womasipala abangu-223 abangazange benze kahle ekucwaningweni kwamabhuku ngo-2023-24.
Ebika ngezinsuku zakhe zokuqala ezingu-100 ehhovisi emhlanganweni womkhandlu ojwayelekile e-Germiston ngoLwesibili, uXhakaza uthe unethemba lokuthi uMphathiswa wezeziMali uJongizizwe Dlabathi usendleleni efanele yokulungisa izimali zikamasipala, onesabelomali sika-R60 billion.
Ngesikhathi ethatha izintambo ngoNdasa, uXhakaza wazibophezela ukuthi uzobika emkhandlwini njalo ngekota mayelana nenqubekela phambili yokuhlinzekwa kwezidingongqangi.
UXhakaza uthe idolobha selisungule i-Operation Clean Audit ukuze kuqinisekiswe ukubusa kamasipala ngendlela.
“Sizinakile zonke izindawo ezihlatshwe nguMcwaningi Mabhuku -Jikelele, kanti sibheke kakhulu ophikweni lokuhlinzekwa kwezidingongqangi lapho bekunezinkontileka ezithile esikhathezeke ngazo.
“Ngokubambisana nomnyango wezezimali, sethule izindlela zokulungisa lesi simo,” usho kanje.
Liphendula inkulumo yemeya, ikhansela le-DA uBrandon Pretorius uthe impumelelo eveziwe ikhombisa isithombe esingacacile ngesipiliyoni sabahlali baseDolobheni, esingavezi iqiniso.
“Ukuvuselela imibono emidala akusoze kwaqhubekisela phambili izidingo zabahlali bethu noma kubhekane nobunzima bezomnotho besikhathi samanje.
“Ukube ubuzimisele ngalezi zinyathelo, ubuzobhekana namahlazo amaningi abenzeka ngaphansi kobuholi buka-Alderman [Sivuyile] Ngodwana,” usho kanje.
UPretorius uthe ngekota yesibili ka-2023, uma kuqhathaniswa nekota yesibili ka-2024, ukuntuleka kwemisebenzi kuleli dolobha kunyuke kusuka ku-32.3% kwaya ku-33.4%.
Khonamanjalo, umholi wekhokhasi ye-ActionSA, uSiyanda Makhoba, uthole u-‘C’ ekusebenzeni kwemeya ehhovisi.
“Inkulumo yemeya iwumzamo wokuveza isithombe esihle esibukeka singaqhakambisi izinselelo eziqhubekayo,” engeza ngokuthi “imibiko ikhombisa ukuthi uzuze u-7.9% kuphela wezikhalazo zokulethwa kwezidingo eziphothuliwe.
“Imfucuza ayikaqoqwa eTembisa, e-Daveyton, Etwatwa, e-Brakpan, e-Benoni, nase-Katlehong ngenxa yokungakhokhelwa kwabahlinzeki bezinsiza,” esho.
Osesithombeni ngenhla: Imeya yaseKurhuleni uNkosindiphile Xhakaza.
Umthombo: Doreen Mokgolo