Lubhalwe nguCelani Sikhakhane
I-African National Congress KwaZulu-Natal isiphoqeleke ukuba idilize abasebenzi iphinde ivale amanye amahhovisi ngenxa yenhlupheko esibhekene nayo, edalwe ukuphunyukwa amandla okuphatha uHulumeni kulesi sifundazwe.
Leli qembu belinezihlalo ezingu-44 elazithola okhethweni luka-2019 obekwenza lithole imali engu-R4.4 million ngenyanga.
Le mali ifakwa iKhomishana yoKhetho eziMele emaqenjini anezihlalo eSishayamthetho nasePhalamende likazwelonke.
Isihlalo ngasinye iqembu lithola imali engu-R99 000 ngenyanga.
Ngemuva kokhetho obelungoNhlaba mhlaka-29, uKhongolose ulahlekelwe izihlalo ezingu-30, wasala nezingu-14 kuphela.
Lokhu kusho ukuthi ngenyanga usithola imadlana engu-R1.4 million.
Okhulumela i-ANC eKZN uMnuz Mafika Mndebele uthe kuphoqeleke ukuba babuyekeze isibalo sabasebenzi babo ngemuva kokuthi bengasayitholi imali abebenikezwa yona phambilini.
“Sigcine sidiliza abasebenzi abangu-15 ngenxa yokuthi senze uhlelo lokubuyekeza isibalo sabo. Njengoba sehlelwe izihlalo, lokho kusho ukuthi nemali ebesiyithola ayisangeni,” kusho uMndebele.
Kwenzeka lokhu nje kukhona abasebenzi abavele bashiya kungakadilizwa ngoba bethi bebevele bengasaholi bebulawa indlala besebenza.
Okunye kuthe ekuqaleni kwalo nyaka kwavela ukuthi uKhongolose usanesikweletu samahhovisi amadala ababewaqashe ku-Cemmercial City eThekwini esibalelwa ku-R400 000.
Nokho uMndebele ukuchithile lokhu wathi abakweleti lutho.