USihle Mavuso ubika kafushane ezinohlonze ezenzeka esifundazweni.
E-Richards Bay – Idolobha laseMhlathuze eliphethwe yi-IFP lihluliwe ecaleni lalo ne-South African Local Government Bargaining Council. Idolobha belifuna ukuyeka ukukhokhela ama-overtime ajwayelekile kubasebenzi abahola ngaphezu kuka-R241,110 ngonyaka kuze kube uNhlangulana 2025. Izinyunyana zabasebenzi i-Imatu ne-Samwu zikuchithile lokhu, zathi umthetho usho ngokusobala ukuthi bonke abasebenzi kumele bakhokhelwe imali ephindwe ngo-1.5 wesilinganiso sehora ngesikhathi esengeziwe.
EMgungundlovu – UDkt Gaston Savoi, ongusomabhizinisi wase-Uruguay, uwavumile amacala okukhwabanisa nenkohlakalo athinta osopolitiki be-ANC phakathi kuka-2004 no-2007 eNkantolo eNkulu yaseMgungundlovu. Uhlawuliswe u-R5-million noma iminyaka eyishumi ejele. Waphinde wayalelwa ukuthi akhokhe u-R15-million wezindleko zecala waphinde wathathelwa u-R60-million nguhulumeni.
KwaNongoma – Abasebenzi basesibhedlela i-St Benedictine, besekelwa inyunyana i-Health and Other Services Personnel Trade Union of South Africa, babhikishele ukuxhashazwa nokucwaswa ngabaphathi babo. Cishe abahlengikazi abangu-100 kanye nabasebenzi bajoyine umbhikisho.
E-Dundee – Iqembu uMkhonto weSizwe (MK) libe nombhikisho kumasipala waseNdumeni oholwa yi-IFP e-Dundee. Babhikishela udlame olubhekiswe kubulili emsebenzini, basola izikhulu ngokufuna ucansi ukuze zikhiphe imisebenzi.
EDumbe – Unobhala-Jikelele we-National Freedom Party, uTeddy Thwala, usethathele izinyathelo zomthetho umengameli weqembu, u-Ivan Barnes. UThwala uthi uBarnes wephule umyalelo wenkantolo omvimba ukuthi amise noma yimaphi amalungu eqembu kuze kube icala lawo eliqhubekayo liphothulwe enkantolo.
Esithombeni ngenhla: Idolobha laseMhlathuze lihlulwe ecaleni elithinta ukukhokhelwa isikhathi esengeziwe.
Umthombo: Facebook