USihle Mavuso ubika kafushane ezihamba phambili esifundazweni
EMgungundlovu –Umisiwe emsebenzini uMnuz Nathi Mpungose onguMqondisi wezindaba zoMdabu eMnyangweni wezokuBusa ngokuBambisana neziNdaba zoMdabu KwaZulu-Natal (CoGTA). Ubhekene nezinsolo zenkohlakalo nokungaphathi kahle umsebenzi. UMpungose unikwe ithuba lokuziphendulela kodwa wakhetha ukungaphenduli.
E-Howick – Umasipala we-DA eMngeni ugxeke u-Athol Trollip we-ActionSA ngokubasola ngokungcoliswa komfula uMngeni osekudale izinkinga zamanzi eNagle Dam nokuholele ekutheni kunqamuke amanzi ezindaweni ezithile zeTheku. I-DA ithi umsebenzi wamanzi nokuthuthwa kwendle usemahlombe esifunda saseMgungundlovu esiphethwe yi-ANC wasola uTrollip ngokudlala umdlalo wepolitiki.
Eshowe – Umasipala waseMlalazi usuvale izitolo zokudla eziningi ezihluleka uhlangabezana nezidingo zezempilo nezokuphepha. Abanye bebedayisa inyama ebolile neziphuzo eseziphelelwe yisikhathi, futhi bedayisa bengenazo izimvume ezifanele. IMeya uQueen Xulu ithe kusazolandela okunye ukuhlolwa ukuqinisekisa ukuphepha kokudla.
Estcourt – Imindeni yamalungu ayisithupha oMkhonto weSizwe (MK) ashone engozini yemoto elibangise eNkandla kuzomele ilinde isikhathi eside ngaphambi kokuba ngcwabe abathandiweyo bayo. Izidumbu zalawa malungu zishe ngendlela embi, kanti kudingeka ukuhlolwa kolibofuzo ukuze kuqinisekiswe ukuthi ngezobani ngaphambi kokuthi kuqhubeke ukungcwatshwa.
KwaNongoma – Zilinganiselwa ku-40 000 izintombi ezilindeleke KwaNongoma kule mpelasonto kumgubho walo nyaka woMkhosi woMhlanga (Zulu Reed Dance) ozoba seSigodlweni Enyokeni. Lona umlenze wesibili womkhosi waminyaka yonke wamasiko. Umlenze wokuqala ububanjelwe esigodlweni saseMachobeni eduze komngcele waseNingizimu Afrika nase-Eswatini.
Esithombeni esingenhla: Umisiwe uNathi Mpungose.
Umthombo: KZN CoGTA