Amagoli ayisikhombisa aya ku-Sundowns

Esanda kushaya igoli lakhe lokuqala leBafana Bafana bebhekene ne-Sao Tome ngoMsombuluko owedlule.

Lomdlali wasesiswini we-Mamelodi Sundowns uThemba ‘Mshishi’ Zwane uphinde wabhalisa igama lakhe eshidini lamagoli lezinsizwa esiza i-MamelodiSundowns ukushaya AmaZulu emqhudelwaneni ngamagoli ayisikhombisa ngeSonto.

UMshishi ube ngumdlali wokuqala ukushaya amagoli amathathu emdlalweni owodwa kule sizini. I-Downs isuke ekusaleleni ngemuva ngegoli elilodwa yayonqoba ngamagoli amane kwamathathu enkundleni yezemidlalo i-Loftus.

Owayekade edlalela i-Kaizer Chiefs ne-Orlando Pirates uLehlohonolo Majoro uvulele Usuthu ngegoli ngomzuzu we-15.

Ngemuva kwalelo goli uMshishi ulutshontshile uhlelo, washaya amagoli amathathu ngomzuzu we-19, wama-21 nowama-30.

Ngemuva nje kwekhefu umgadli owayedlalela i-Pirates, uLuvuyo Memela, ushayele iqembu laseThekwini igoli ukuze anciphise isikweletu.

Ngomzuzu wama-53 Usuthu luzitholele amagoli amabili futhi ngenkathi umgadli wamagoli aphezulu wesizini uPeter Shalulile eshaya igoli okuyenze layishaye ngamagoli amane kwamabili i-Downs.

USandile Khumalo ubuyisele igoli elilodwa izivakashini ezinenkani emizuzwini engana-59 okwenze kwaba ngamagoli amane kwamathathu.

UMshishi namagoli akhe amathathu amngenise esicongweni samagoli we-Premiership ngamagoli amane. UMshishi uklonyeliswe ngendondo ye-Absa Premiership Footballer yesizini edlule ngenyanga edlule.

I-Downs iphezulu ku-Premiership ngamaphuzu ayishumi, isinqobe imidlalo emithathu yadlala ngokulingana kowodwa. Uma beqhubeka nalokhu kudlala bangasivikela kalula isicoco seligi abasinqobe kathathu kulandelana.

Usuthu olusele luzikhotha amanxeba lusendaweni ye-12 ngamaphuzu amane. Ukuhlulwa kwabo besekungokwesibili ngeSonto.

Eminye imiphumela ye-Premiership: i-Cape Town City ishaye i-Blomfontein Celtic ngamagoli amane kwamabili; i-Thakhuma Tsha Madzivhandila yona yanqoba ngegoli elilodwa eqandeni idlala ne-Baroka FC.