Lubhalwe ngu-Anita Dangazele noCelani Sikhakhane
Inkosi uBuyelekhaya Dalindyebo izimisele ngokuvimba iqembu lezigelekeqe, okusolwa ukuthi lingaphansi kweNdlunkulu yabaThembu, ukuba liqole imali ezikoleni zase-Mthatha.
Lokhu kuvele emhlanganweni womphakathi ngoLwesibili, obizwe yiSilo ngemuva kokuphoqeleka ukuthi kuvalwe isikole e-Mthatha ngenxa yokusatshiswa yileli qembu.
Iqembu lamalungu omndeni wasebukhosini babaThembu kuthiwa ligasele esikoleni samabanga aphansi i-Laphumikhwezi Primary, e-Marhambeni, lafuna ingxenye yemali yesikole esiyithola ngokuba nombhoshongo wenethiwekhi yomakhalekhukhwini esegcekeni yesikole.
Kwesinye isikole kuthiwa iqulu lishaye iphini likathishanhloko kwathi kwesinye laduna ihholo lesikole.
Kuthiwa baphinde bamisa ukwakhiwa kwethangi lamanzi, befuna ingxenye yenzuzo.
Amaphoyisa e-SAPS asesabalalise abomthetho abengeziwe ezindaweni ezinobugebengu e-Eastern Cape, e-Gqeberha nase-Mthatha ukuze kunqandwe abaphangi, abathumbi namanye amaqembu ezigebengu.
Okhulumela amaphoyisa kuzwelonke, uBrigadier Athlenda Mathe, uthe sekutshalwe amathimba ezinhlaka ezehlukene ukuze avimbe, alwe, aphenye futhi abophe abaphehla izigameko zodlame kanye nokuqola.
NgoLwesibili, uKhomishana wamaphoyisa kuzwelonke, uJenene Fannie Masemola, unxuse amalungu omphakathi ukuthi ahlonze labo abaqola imali.
“Inselelo esibhekene nayo ngeyokuthi amalungu omphakathi awafuni ukubika izigameko zokuqolwa kwabantu.
“Sinxusa imiphakathi yethu ukuthi iphumele obala isibikele ngazo zonke izinhlobo zobugebengu futhi ihlonze laba bantu ukuze sikwazi ukubabopha siqinise namacala azongena ezinkantolo,” kusho uMasemola.
Emhlanganweni wangoLwesibili, inkosi ithe lawo “malungu omndeni” asolwa ngokuqola imiphakathi kuzobhekwana nawo ngesikhathi esifanele.
“Uma abantu bephazamisa ukuqhubeka kwezifundo nemfundo labo bantu bayizigebengu. Ngakho-ke size lapha ukuzokwenza isiqiniseko sokuthi isikole siyavulwa futhi nokufunda kuyaqhubeka.
“Emuva kwalokho, sizoyixazulula inkinga phakathi kwami nabo [abasolwa ngokuba ngabaphangi emndenini wasebukhosini] … sizolulungisa lolu daba.”
Inkosi ithe izobe sisemasangweni esikole namaphoyisa ngoLwesithathu ukunisekisa ukuthi siyavulwa.
Okhulumela uMnyango wezeMfundo e-Eastern Cape, uMalibongwe Mtima, utshele i-Scrolla.Africa ngoMsombuluko ukuthi uMnyango uyazi ngezinkinga ezikoleni ezintathu – i-Laphumikhwezi, iMandela Park, ne-Efata School for the Deaf and Blind – kanti ezinye zisaphenywa.
Okhulumela inkosi uDalindyebo, iNdlovukazi uNtando Dalindyebo, utshele i-Scrolla.Africa ukuthi amanye amalungu e-ANC, afike esikoleni ngoLwesibili ekuseni egqoke izikibha zeqembu, azama ukuphazamisa umhlangano.
“Bebememeza amagama abanye abaholi abaqavile, kodwa kuthe uma kufika inkosi, umhlangano waqhubeka njengoba bekuhleliwe.
“Engingakutshela khona ukuthi labo bantu abagqugquzela lokhu bathi bangamalungu eSigodlo sabaThembu, kodwa asibazi,” kusho iNdlovukazi.
Inkosi inxuse imiphakathi ethintekayo ukuthi itshele amaphoyisa izitatimende zayo ukuze kuqalwe uphenyo.
Esithombeni esingenhla: Inkosi yabaThembu uBuyelekhaya Dalindyebo.
Umthombo: Uthunyelwe