SINDISANI IDOLOBHA LETHU: U-Everson Luhanga ubevakashele indawo yedolobha engasasebenzi eyayihloselwe ukugcina izimoto, wafica indawo icekelwe phansi izigebengu.
NgoNhlangulana kulo nyaka, i-Scrolla.Africa yathola ucingo oluvela eqenjini lezakhamuzi ezihlala endaweni yaseGoli e-Cleveland.
Babekhathazekile ngebhilidi ledolobha elise-Denver, eduze kwesikhungo sokukhiqiza amaloli i-Iveco ukuthi licekelwa phansi.
Eminyakeni embalwa nje edlule, le ndawo yayizoba isizinda sohlelo lukahulumeni olunamandla. Kusetshenziswe u-R45 million ukuyiguqula ibe yindawo yokugcina izimoto ukuze imumathe izimoto ezingamashumi ayizinkulungwane eziboshiwe. Kodwa umsebenzi washiywa kanjalo futhi imali yalahleka.
Kusukela ngaleso sikhathi izigebengu ezihlome ngezando namashizolo ziye zasusa yonke into ethengiswayo, kusukela ezitini kuya kwizinsimbi.
Isakhamuzi uThando Mashishi uthathe ithimba lethu ohambweni olukhombisa ukuthi izigebengu zicekele phansi kanjani ibhilidi elikhazimulayo. Isakhiwo kwakuyimboni endala yakwa-Nampak eyayisetshenziselwa ukukhiqiza amalebula.
Uthe abahlali baqala ukugqekeza isango labo elikhiyiwe ngoLwezi 2022. “Indawo ibikhiyiwe futhi iyibhilidi elihle elikhulu.
“Kuqale kwafika abantu lapha bathi bazohlala kuleli bhilidi. Baqala bamaka indawo yabo ngamagama abo ebhalwe phansi nasodongeni,” usho kanje.
Ngesikhathi ithimba le-Scrolla.Africa lifika kule ndawo, bekugcwele iningi limatasa liqaqa izinsimbi. Ezinye bezinqwabelene ekhoneni kanye nezitini zilungele ukuthathwa futhi zidayiswe.
Ngokungesabi ukuqoshwa, baqhubekile nokuhlubula isakhiwo kubuka amakhamera.
Igumbi elincane okugcinwe kulo i-transformer kagesi seliphendulwe indawo yokuhlala. I-transformer yebiwe futhi umnyango wekamelo ububhalwe igama “lomnikazi”.
Amanzi aphuma emapayipini amanzi angaphansi komhlaba kule ndawo axhaxhaza ubusuku nemini.
UThando uthe waqala ukufuna usizo kubantu abehlukene kuhulumeni ukuze ahlenge leli bhilidi kungekho ophumela obala. “Wonke umuntu ubonakala ehambela kude futhi akazimisele ukusiza,” esho.
IMeya yaseGoli, uKabelo Gwamanda ikuqinisekisile esitatimendeni esikhishwe ngeledlule ukuthi le ndawo okukhulunywa ngayo ngeyeDolobha laseGoli yathengwa ngo-2019 ngemali engu-R40 million futhi kwakuhloswe ngayo ukuthi isetshenziswe njengendawo ye-JMPD yokugcina izimoto eziboshiwe.
Kuphinde kwasetshenziswa u-R5 million ukuvikela lezi zakhiwo.
“Ngokophenyo lokuqala olwenziwa yi-JMPD, kunezinsolo zokuthi isikhulu esiphezulu sophiko lwamaphoyisa eNingizimu Afrika singase sibe nesandla ekuhlaselweni kwempahla okuqhubekayo,” kusho uGwamanda.
UGwamanda uvakashele kule ndawo ngoLwesithathu ngesonto eledlule. Ujube umphathi wedolobha kanye nabaphathi beDolobha ukuthi bathathe izinyathelo ezifanele zokuvikela le ndawo kunoma yimuphi umonakalo oqhubekayo ezikhungweni zayo.