Lubhalwe nguMashudu Mabila
Owesilisa (50) osolwa ngokushaya umfana oneminyaka engu-16 waqede wamkhomba ngesibhamu utholwe enecala lokushaya ngenhloso yokulimaza.
NgoLwesihlanu, iNkantolo yeMantshi yase-Groblersdal igwebe uCorrie Pretorious izinyanga ezingu-12 ejele noma inhlawulo ka-R12,000.
Ngonyaka odlule, i-Scrolla.Africa yabika ukuthi ngomhlaka-15 kuNhlolanja uPretorius kanye nomfana babesenxanxatheleni yezitolo i-Groblersdal Game Mall ngesikhathi kwenzeka lesi sigameko.
UPretorious waqoshwa esabisa lo mfana ngesibhamu kubangwa izinongo zama-chips.
Osemusha uKopano Makweng wase-Groblersdal e-Limpopo wayesesitolo sokudla nomfowabo ngehora lesishiyagalombili ebusuku ngesikhathi becela owesilisa owayesebenzisa usawoti ukuthi abadlulisele uma eseqedile.
Ividiyo yesigameko eyasabalala ezinkundleni zokuxhumana ikhombisa uPretorius ethuka inhlamba ekhomba isisulu ngesibhamu ngenxa yesicelo sakhe.
Owengamele leli cala uMnu Monjane ugwebe uPretorius ukuthi akhokhe u-R12 000 noma abhadle ejele izinyanga ezingu-12 kanti ingxenye yeminyaka emihlanu ithi akakufanele ukuba nesibhamu.
Okhulumela i-NPA e-Limpopo uMashudu Malabi-Dzhangi uthe isigwebo sizothumela umyalezo oshubile nakwabanye abangase benze amacala.
UPretorius ulivumile icala wakhombisa ukuzisola ngesenzo sakhe.
Isithombe esingenhla: UCorrie Pretorious
Umthombo wesithombe: Okhulumela i-NPA esifundeni sase-Limpopo