Lubhalwe nguPalesa Matlala
Umakhelwane uqophe i-video yokuhlaselwa kwentombazane esiwubufakazi obubalulekile kuleli cala.
Umholi weBosa, uMmusi Maimane, uthe uhulumeni kumele abhalise abantu abahlukumeza ngokocansi kuzwelonke ukuze kuvikelwe imiphakathi yethu.
Owesilisa waseDobsonville osolwa ngokuthumba nokudlwengula intombazane eneminyaka engu-13 ubudala usesihoxisile isicelo sakhe sebheyili kulandela intukuthelo yomphakathi.
Umsolwa oneminyaka engu-56 ubudala ungumdikoni webandla futhi uyilungu legatsha le-African National Congress.
Usolwa ngokuhlasela le ntombazanyana ngempelasonto yePhasika.
Umakhelwane uqophe i-video yalesi sigameko. Amaphoyisa asebenzisa le-video njengobufakazi obubalulekile ecaleni abhekene nalo.
Le ndoda ingene enkantolo imamatheka futhi ingathukile. Kodwa ngemuva kokuvela isikhashana ummeli wayo utshele inkantolo ukuthi ngeke esasifaka isicelo sokuthi adedelwe ngebheyili.
Umbuso usamukele isinqumo sakhe sokuhlala ejele. Abashushisi bacele inkantolo ukuthi ilibambezele leli cala ukuze ibanike isikhathi sokuqeda umsebenzi wabo. Bathe basadinga ukuqoqa amanye ama-video namaphepha.
Umholi we-Build One South Africa uMmusi Maimane ukhulume kakhulu ngaleli cala.
Uthe izwe kumele likhiphe ihlu lukazwelonke lwabantu abahlukumeza ngokocansi ukuze abantu babazi abantu abasondelene nabo.
Uthe angaphezulu kuka-32 000 amagama abhalwe ohlwini. Uxwayise ngokuthi lezi zigilamkhuba zisezikoleni, emiphakathini nasemigwaqweni.
UMaimane uthe kuyakhathaza kakhulu uma umuntu othathwa njengomholi oziphatha kahle esolwa ngokulimaza ingane.
Uthe asikho isiqu noma isikhundla okufanele sivikele noma ngubani ukuthi abhekane nomthetho.
Ucele amasonto nemiphakathi ukuthi isukume iqine ekulweni nokuhlukunyezwa. Uthe abantu akufanele bathule noma bavikele labo abahlukumeza abanye.
Unxuse abantu ukuthi bakhe izindawo eziphephile lapho izisulu zizobika khona ngokuhlukunyezwa futhi basebenzisane namaphoyisa.
Umsolwa usagqunywe ejele. Uzobuyela enkantolo ngomhlaka-20 kuNhlaba.
Esithombeni esingenhla: Umsolwa.
Umthombo wesithombe: Palesa Matlala