Lubhalwe nguCelani Sikhakhane
UNgqongqoshe wezeMidlalo, ubuCiko namaSiko KwaZulu-Natal ukhwele wadilika kulabo ababiza uMntwana uSimakade kaZwelithini ngeSilo, wathi baxova uZulu ngoba iNgonyama uMisuzulu kaZwelithini kuphela.
UMnuz Mtomuhle Khawula ukusho lokhu ngoLwesine echitha iposta esatshalaliswe ezinkundleni zokuxhumana evezwa sengathi eyomnyango wakhe enesimemezelo esithi “Isilo uSimakade kaZwelithini uthi uZulu awuhlangane wonke naye eMkhosini woMhlanga oseNyokeni noqala kusasa ngoLwesihlanu.”
UKhawula uthe kungukudukisa okuphindiwe lokhu ngoba bona benguHulumeni weSilo uMisuzulu kaZwelithini abasoze baxhase imicimbi yomgunyathi okuthiwa eyaseNdlunkulu kaZulu.
“Umnyango wami ongaphansi kukaHulumeni oholwa uNdunankulu wesifundazwe uMnuz Thami Ntuli neNdlunkulu kaZulu bayaziqhelelanisa nalo mhlola futhi leyo posta ebiza uMntwana uSimakade ngeSilo esimema abantu eMhlangeni asiyazi,” kusho uKhawula.
Uqhube wathi iSilo uMisuzulu kaZwelithini nguye kuphela iNgonyama ebusayo nehlonishwa ngokusemthethweni uMthethosisekelo waseNingizimu Afrika.
NgoLwesibili uMntwana uSimakade ukhiphe isitatimende abezibiza kuso ngeSilo uZondamagwala naye ekhuza umhlola ngalabo abasabalalisa le posta ayichaze ngokuthi ingcolisa igama lakhe ngoba akayazi.