Lubhalwe nguDylan Bettencourt
UPatrice Motsepe uthi uzoshiya i-CAF ngo-2029 ngemuva kwemigomo emibili yokusebenza futhi ngeke aqhubeke nesikhathi sesithathu.
UMotsepe ukwenqabile ukuba nguMengameli we-Fifa futhi wasekela uGianni Infantino, ethi ube ngumuntu othembekile ebholeni lase-Afrika.
UPatrice Motsepe uthi uzoshiya isikhundla sakhe sokuba nguMengameli we-CAF uma kuphela isikhathi sakhe sesibili sokusebenza ngo-2029.
Uphinde wakwenqaba ukuncintisana esikhundleni sokuba nguMengameli we-Fifa.
Iphephandaba i-Citizen libike ukuthi uMotsepe ukuqinisekisile lokhu ngezinhlelo zakhe ngesikhathi senkomfa nabezindaba eSandton ngoLwesithathu.
Owayengumnikazi weMamelodi Sundowns waba nguMengameli we-CAF ngoNdasa ka-2021 futhi wathola isikhathi sesibili sokusebenza ngo-2025.
Uthe akekho ozomenza ashintshe umqondo ahlale ihlandla lesithathu.
“Akekho ozongincenga ukuthi ngichithe isikhathi esingaphezu kwemigomo emibili nginguMengameli we-CAF,” kusho uMotsepe.
UMotsepe uphinde wasekela uMengameli we-Fifa wamanje uGianni Infantino, amchaze njengomngane oseduze futhi othembekile.
“Mina ngokwami ngiyameseka u-Infantino. Ungumngane omuhle, umngane othembekile,” kusho yena. “Uthembekile e-Afrika. Uma abantu bethembekile kuwe, awusoze wabakhaphela.”
UMotsepe uthe ukusiza ibhola lase-Afrika kusamjabulisa, kodwa akafuni isikhundla esiphezulu e-Fifa.
“Ukusiza e-Afrika kuyangijabulisa. I-Fifa ayidingi mina,” kusho yena. “Kukhona abanye abantu abanekhono kakhulu futhi abenza umsebenzi omuhle.”
Esithombeni esingenhla: UMengameli we-CAF uPatrice Motsepe ukhuluma nabezindaba.
Umthombo wesithombe: @Caf_Online