Lubhalwe nguDoreen Mokgolo
“Ekugcineni! Singamngcwaba othandiweyo wethu!’ kucabanga umndeni wakwaMajola ngesikhathi iDolobha lase-Ekurhuleni libanikeza ipauper’s funeral wesihlobo sabo, uBafana Majola.
Kodwa sekudlule amasonto, alukho usuku lomngcwabo.
Umndeni ukhathazekile ngokuthi kungenzeka isidumbu sakhe silahlekile noma singcwatshwe kwenye indawo ngephutha.
UBafana, okukholakala ukuthi wazalwa ngo-1975, udlule emhlabeni mhlaka-20 kuNhlangulana esibhedlela iPholosong eTsakani. Isidumbu sakhe sasuswa emakhazeni kahulumeni sayiswa kumakhaza azimele.
Kodwa-ke, umndeni ukwazi ukuhlanganisa u-R3,500 kuphela ngeminikelo yomphakathi futhi awukwazi ukukhokha u-R10,500 wokukhokhela umngcwabi ozimele.
Ubabekazi kaBafana u-Emma Majola utshele iScrollla.Africa ukuthi ikhansela lewadi labacebisa ukuthi bafake isicelo somngcwabo womhlwempu.
Umndeni usebenzise iminikelo yomphakathi ukukhokhela izindleko zokukhipha isidumbu sikaBafana esibhedlela nokusigcina.
Ngemuva kokuvunywa kwesicelo sawo, isidumbu sikaBafana sidluliselwe kwaPhumlani Funeral Services, umngcwabi onenkontileka yemingcwabo kamasipala.
“Siyazi ukuthi asinamali, futhi ubengenawo umasingcwabisane, kodwa usafanelwe ukungcwatshwa ngendlela,” kusho u-Emma.
“Kwenziwe wonke amaphepha, isidumbu sabe sesiyiswa ePhumlani Funeral Services.”
Kodwa, imizamo yomndeni yokuthola isiqinisekiso enkampanini ngosuku lomngcwabo ayiphumelelanga.
Ngesikhathi iScrolla.Africa ithinta omele iPhumlani Funeral Services, ozibize ngoTebogo, uvele wahleka wathi umngcwabo uzokwenzeka ngaphambi kokuvala ucingo, ekhala ngezinkinga zenethiwekhi.
Okhulumela uMasipala waseKurhuleni uZweli Dlamini uthe umasipala uzobuza umngcwabi ukuze kuxazululwe lolu daba.
Osesithombeni esingenhla: Emma Khumalo.
Umthombo: Sithunyelwe