Lubhalwe nguCelani Sikhakhane
Abalimi abamhlophe bathi uMengameli waseMelika uqamba amanga aluhlaza ngeziphambano ezazibekwe eduze nomgwaqo Newcastle, KwaZulu-Natal uma ethi zingamathuna abalimi asebebulewe.
Lokhu kuvele ngesikhathi omunye wabalimi nongumnikazi walezi ziphambano exoxa ohlelweni i-60 minutes lwesiteshi saseMelika okuyiCBS nalapho ebechaza khona ukuthi lezi ziphambano ezakhe futhi nguye owayezifaka ngosuku lo mngcwabo womunye wabangani bakhe eNewcastle njengophawu lokukhumbula bonke abalimi asebedlulile emhlabeni.
Ungxoxweni nentatheli esimnkantshubomvu ebuye ibekuCNN okunguMnuz Andersoon Cooper, umlimi uDarrel Brown uthe lezi ziphambano kungamanga aluhlaza ukuthi zingamathuna.
“Impela uMengameli Donald Trum wakhuluma ilumbo ngalezi ziphambano ngoba zazifakwe yimi ngosuku lo mngcwabo womunye wabalimi ongumngani wami owayebulewe. Futhi azihlalanga ngisho amahora angu-48 ngoba ngasheshe ngazisusa. Ngakho kungamanga aluhlaza ukuthi zazingamathuna abalimi abamhlophe asebebulewe,,” usho kanje.
UTrump wagolozela uMengameli Cyril Raphosa ngonyaka owedlule ethi iNingizimu Afrika ingcolile ngoba isibaqedile abalimi abamhlophe ababulawa usuku nosuku.
Waze wafakazisa ngalezi ziphambano wathi zingamathuna enqwaba yabalimi asebesocongiwe.
Kwala noma uRamaphosa ezama ukumchazela ukuthi awekho amathuna eNingizimu Afrika aseduze komgwaqo futhi amaningi kangaka.
Umlimi uNhlanhla Zuma waseNewcastle uthe yena useze washiya phansi ipulazi lakhe waphuma kulommkhakha ngenxa yokuhlaselwa izigebengu.
Uthi okubuhlungu ukuthi abalimi abamnyama babulawa kakhulu kodwa indaba yabo iyanyathelwa inganakwa.
“Mina besengihlaselwe izikhathi eziningana futhi kucaca ukuthi lezi zigebengu ukube bezingigica epulazini lami bezingangibulala. Ngigcine ngishiya phansi ngoba ngiphephisa impilo yami neyomndeni wami,” kusho uZuma.
UMnuz Johann Kotze waseKapa uthe yena uyibhunu eliziqhenyayo kodwa selokhu azalwa akakaze abone ukubulawa kwabalimi abamhlophe okushiwo uTrump eNingizimu Afrika.
Uthe ngonyaka owedlule wafika eWhite House watshelwa ngale mbudane yokusocongwa kwabalimi abamhlophe wavele waxakeka ukuthi bakuthathaphi lokhu ngoba yena akakwazi.