Lubhalwe nguCelani Sikhakhane
Abaholi bakaKhongolose nabeNational Freedom Party ne-IFP bathole ithuba lokukhohlwa izinkinga zezepolitiki njengoba kubhekwe ePhasikeni bayonikela ngezinkomo ebandleni lamaWeseli kwaNongoma.
Leli bandla lizoba nenkonzo enkulu yePhasika yesiFunda saseNatali ezobanjelwa eSekethe yakwaNongoma,KwaZulu-Natal.
Selokhu le nkonzo imenyezelwe osopolitiki baphuma bengena ukuzoxhasa ngezinto ezizosiza amakholwa ezahlukene kuvalwa ukudla izinkomo amanzi nokunye okuningi.
Njengoba isonto liqalile kubonakale ubuholi beNFP buholwa owayeyiMeya yakwaNongoma uMnuz Jeremiah Mavundla behambise inkunzi yenkomo kuleli bandla.
Kuthe kusenjalo kusaqhuma umkikizo nohaleluya,kwabe kungena ubuholi bukaKhongolose baseMzala Nxumalo Region eZululand buholwa uMnuz Thokozani Sikhakhane osesigungwini sekomitini lesikhashana kule nhlangano .
Kuvesekutheleka noPhiko lwentsha ye-IFP luholwa uNobhala-Jikelele walo uMnuz Mlungisi Mabaso belethe nabo eyabo inkomo yokuphekisa leli bandla ukuze amakholwa akwazi ukwehlisa amazwi ayisikhombisa ngenyama.
UMnuz Welcome Ntombela obehola intsha yamaWeseli kwiNatal District uthe bakuthokozele kakhulu okwenziwe osopolitiki ukuzidela kwabanakho bezonikelela amakholwa.
“Sidlulisa okukhulu ukubonga kubaholi bethu ngabakwenzele leli bandla njengoba sibonile i-NFP KwaZulu-Natal ngaphansi kukaSihlalo wayo uMbali Shinga ne-ANC iholwa uSikhakhane kanye ne-IFPB eholwa uMabaso bezifikele mathupha ukuzondiphekisa siyibandla njengoba sinenkonzo enkulu kangaka,” kusho uNtombela.