Lubhalwe nguSihle Mavuso
Ubengumqondisi-jikelele kuhulumeni wesifundazwe iKwaZulu-Natal uMnuz Nhlanhla Ngidi igama lakhe lifakwe phezulu eqhulwini ohlwini lamalungu eMK aya esiShayamthetho sakulesi sifundazwe
Lokhu kwenza uNgidi kube nguyena ongase abe uNdunankulu weqembu omkhankaso walo wokhetho lamhlaka 29 kuNhlaba kulo nyaka uholwa iloyo owayenguMengameli wezwe ne-ANC uMnuz Jacob Zuma.
Okunye okugqamile, i-MK iqoke iNkosi uPhathisizwe Chiliza esikhundleni sokuba ilungu lesiShayamthetho sesifundazwe eMgungundlovu.
UChiliza ongumholi wesizwe sakwaMdunge eningizimu yeKwaZulu-Natal nowake waba ilungu le-ANC uphinde abe iphini likaNdunankulu wesizwe samaZulu.
Uqokwe iSilo uMisuzulu kaZwelithini eSandlwana ngoMasingana.
Elinye igama eligqamile ohlwini lwe-MK KwaZulu-Natal uThobani Zuma owayeyiPhini leMeya ye-ANC kumasipala waseMsunduzi (Mgungundlovu).
UThobani Zuma ubelokhu esohlangothini lwalowo owayenguMengameli wezwe emacaleni akhe ezinkantolo. Isizwe silandelela uzalo lwaso kwabakwaZuma baseMpendle.
Khonamanjalo, abahlanu abebengamakhansela e-ANC amawadi kumasipala waseMzumbe balaxaze iqembu elibusayo bajoyina i-MK.
La makhansela – u-Ayanda Duma, uThuthukani Jeza, uBhekisisa Ngema, uThulo Mkhungo kanye noSibonakaliso Hadebe – babalule inkohlakalo evunywe i-ANC kulo masipala njengesizathu sokuhoxa.
Ukuhamba kwabo kuvula indlela yokhetho lokuchibiyela – kanti uma i-ANC ishaywa izohluleka ukulawula umasipala.
Esithombeni esingenhla: UNhlanhla Ngidi uhola iqembu le-MK KwaZulu-Natal.
Umthombo wesithombe: Facebook