Lubhalwe nguZukile Majova
Umhleli Wezepolitiki
I-ANC ibona i-IFP ephinde yavuka KwaZulu-Natal njengengozi enkulu ekuphatheni kwayo isifundazwe kunoMkhonto Wesizwe (MK) kaJacob Zuma.
USihlalo we-ANC uMnuz Gwede Mantashe uthe iqembu elibusayo likhathazeke kakhulu ngokukhula kwe-IFP esifundazweni kune-MK.
Ucwaningo lubikezela ukuthi i-MK ingase ithathe u-25% wamavoti KwaZulu-Natal, okunikeze isithombe sangempela ekwakheni uhulumeni wobumbano wesikhathi esizayo esifundazweni.
UMantashe uthe i-ANC ilindele ukuthi i-MK ithathe abavoti eqenjini ngalinye elikhulu okubalwa i-ANC, i-IFP, i-EFF kanye ne-DA.
“Ngiqinisekile ukuthi imiphumela sizoyithola KwaZulu-Natal. Iqembu elizoba inkinga kithina kuzoba i-IFP hhayi i-MK.
UMantashe utshele lo msakazo womphakathi ukuthi i-ANC izama ukunqoba ukhetho ngaphandle kokuthi ibumbe umfelandawonye ezingeni likahulumeni kazwelonke.
Lo mholi we-ANC uthe imifelandawonye ayisebenzi ku-ANC.
Kodwa-ke, zonke izinkomba zithi i-IFP ne-ANC bazodinga amadlelandawonke ukuze bakhe uhulumeni KwaZulu-Natal.
Iqembu elibusayo vele likumbimbi ne-EFF ezingeni lohulumeni basekhaya esifundazweni.
Kodwa lo mfelandawonye ubulokhu uhlulwa okhethweni lokuchibiyela ngenxa yokuqina komfelandawonye ophakathi kwe-IFP ne-DA.
Umfelandawonye we-ANC ne-EFF nawo usengcupheni yokuwa ngenxa yokuvela kwe-MK.
Umholi we-EFF uJulius Malema noZuma sekunesikhathi eside bezwakalisa ukuthi la maqembu amabili angasebenzisana esikhathini esizayo njengoba enezinhloso ezifanayo.
I-EFF ineme ngomfelandawonye wayo ne-ANC eThekwini, Ekurhuleni naseGoli.
Umfelandawonye onamandla kunawo wonke KwaZulu-Natal ngowe-IFP ne-DA kanye namalungu e-Multi-Party Charter for SA ahlanganisa i-ActionSA, i-Freedom Front Plus kanye ne-ACDP.
Njengoba uhulumeni kaMengameli uCyril Ramaphosa usashushisa uZuma ngokukhwabanisa nenkohlakalo, mancane amathuba okuthi la maqembu amabili akhe umfelandawonye ngemuva kokhetho lwangomhlaka-29 kuNhlaba.