Lubhalwe nguNkhensani Mthombeni
UNgqongqoshe uGayton McKenzie uvimbe imali yomnyango ekhokhela uMama Joy Chauke kodwa waxhasa abanye abalandeli nabaculi ngohambo lwebhola likanobhutshuzwayo.
UMama Joy Chauke ulibangise eNorth America ngoMsombuluko futhi ufuna abantu baseNingizimu Afrika bathumele iminikelo yemali yohambo.
Umlandeli webhola likanobhutshuzwayo uMama Joy Chauke ulibangise eNorth America ngoMsombuluko ukuyokweseka iBafana Bafana eNdebeni yoMhlaba yeFifa ka-2026. Uhamba yedwa futhi uzikhokhela ephaketheni lakhe uhambo.
UChauke washaqeka ngesikhathi uNgqongqoshe wezeMidlalo, ezobuCiko namaSiko uGayton McKenzie emisa uMnyango ukumkhokhela imali yohambo. Umnyango ukhethe ukukhokhela abanye abalandeli, abadidiyeli nabaculi okubalwa kubo iMicasa neMafikizolo.
Umlandeli uthe usedlulisile ukuthi akaxhaswanga futhi uyajabula ukuthi uyaya ngemuva kokuvalelwa eceleni.
“Sengiphilile futhi sengiphumile kulowo mdlalo. Awukwazi ukuphoqa umuntu ukuthi akuthande, engakuthandi. ONgqongqoshe bayashintsha ngaso sonke isikhathi, ngokuzayo kuzoba ngumuntu ohlukile, okholelwa embonweni wami nothando lwami ngalo mdlalo,” usho kanje.
UChauke ucela abantu baseNingizimu Afrika ukuthi bamsize ngezimali zokuhamba ngoba iNorth America iyabiza. Wabelane nge-akhawunti yakhe yasebhange yakwa-Capitec kanye ne-akhawunti yakhe ye-X eqinisekisiwe ukuze abantu bakwazi ukumthumelela imali.
UChauke uzizwa eyingxenye ebalulekile yeqembu uma ebabuka bedlala.
“Kimina kubalulekile ukweseka iqembu lesizwe. Ngizizwa sengathi ngingumdlali ka-12 futhi uyazi uma iqembu lilahlekelwa umdlali oyedwa kuba buhlungu futhi lizizwa lingaphelele,” usho kanje.
Ebuzwa ukuthi iBafana Bafana izohamba ibanga elingakanani kulo mqhudelwano, uthe iqembu lizongena kumaqembu angu-30.
UChauke uthe ufuna ukuhlangana nabalandeli bakwamanye amazwe emiqhudelwaneni edlule. Uthe abalandeli emhlabeni wonke banomsebenzi wokwesekana nokulwa nobuxhwanguxhwangu ezinkundleni. Ubonge abaxhasi bakhe, abamesekayo nawo wonke umuntu okholelwa embonweni wakhe.
Esithombeni esingenhla: Umlandeli webhola likanobhutshuzwayo uMama Joy Chauke.
Umthombo wesithombe: Sithunyelwe