Lubhalwe ngu-Anita Dangazele
UNhlamulo Sambo ugwazwe wabulawa KwaNonqaba ngempelasonto. Amaphoyisa athi ubulawe ngesikhathi ezama ukweba emjondolo.
Umama wakhe uPatricia uthi indodana yakhe yahlaselwa ngoba ingumTsonga, wathi ufakazi watshela umndeni ukuthi omunye umfana owayekhona wasinda ngoba engumXhosa.
Owesilisa (23) uvele eNkantolo yeMantshi yaseMossel Bay ngoLwesihlanu, mayelana necala lokubulala uNhlamulo Sambo.
UNhlamulo wayeneminyaka engu-19 ubudala futhi evela eLimpopo. Isidumbu sakhe sibuyiselwe KwaNonqaba eMossel Bay ngoLwesine ngaphambi kokuthi siyiswe ekhaya ukuze singcwatshwe.
Amaphoyisa athi uphenyo lwawo alutholi ukuhlobana phakathi kokushona kwakhe nezibhelu ezimelene nabokufika ezilokhu zivutha amalangabi ezingxenyeni ezithile zaseMossel Bay.
Basola ukuthi uNhlamulo wahlaselwa ngesikhathi ezama ukweba emjondolo KwaNonqaba.
Umama wakhe uPatricia Sambo akayamukeli leyonto eshiwo amaphoyisa.
Ekhuluma ne-Eden FM, uthe umfana okuthiwa wayehamba noNhlamulo ngalobo busuku watshela umndeni ngokwenzekile. Laba bobabili babecashe emjondolo. Ngokusho kukaPatricia, omunye umfana akazange athintwe.
“Lo omunye umfana abakaze bamthinte ngoba engumXhosa, wabulawa lo mfana wami ngoba engumTsonga waseLimpopo,” esho.
Uthe ukuvakashela emakhazeni kwenza ukulahlekelwa kube nzima ukukuthwala, akulula.
“Bagwaze ingane yami eduze kwenhliziyo, okusho ukuthi bebazi ukuthi bafuna ukuyibulala indodana yami.
Kwathi uma bebulala indodana yami, ngezwa kuthiwa wayechaza ukuthi ungumTsonga futhi unomazisi. Ngakho angazi ukuthi kungani bebulale indodana yami,” kusho yena.
“Ngilimele kakhulu. Ukubulala indodana yami njengenja. Ngilimele kakhulu.”
Izinxushunxushu zaKwaNonqaba ziqubuke ngesonto eledlule. Ibalelwa ku-55 imijondolo eshiswe emijondolo yase-Asla Park.
Abesilisa ababili abangabokudabuka eMozambique, abaneminyaka engu-27 no-43 ubudala, babulawa ngesikhathi sodlame. Kuboshwe abahlanu mayelana nalezi zibhelu.
Ababili bavele enkantolo ngamacala okudala udlame emphakathini base benikwa ibheyili.
Esithombeni esingenhla: UNhlamulo Sambo (19) ugwazwe washona KwaNonqaba, eMossel Bay, ngempelasonto. Owesilisa uvele enkantolo ngoLwesihlanu mayelana nokubulawa kwakhe.
Umthombo wesithombe: Sithunyelwe