Lubhalwe nguZukile Majova
Iqembu elisha lezepolitiki likaMnuz Jacob Zuma lithola ukwesekwa amalungu e-ANC ne-EFF njengoba liqhubeka nokundlondlobala ngaphandle KwaZulu-Natal.
I-MK ihambe namavoti angu-28% ewadini egcwele i-ANC kuMasipala waseGovan Mbeki eMpumalanga ngoLwesithathu.
Ukhetho lokuchibiyela lusukela ekubulaweni kwekhansela le-ANC uMnuz Simphiwe Sindelo owasinda kaningi bezama ukumbulala futhi bagcina bekwazile ukumthola.
I-ANC igcine iwadi yayo ngo-51% kwathi i-EFF yathola u-18% yehla ngo-8%, i-IFP yathola u-3% kwathi iDA ethole amavoti angu-7% ku-ward 4 ayizange ilungenele ukhetho lokuchibiyela.
Lolu bekuwukhetho lokuqala lokuchibiyela lwe-MK ngaphandle kwaseKZN lapho iqembu lingenele ukhetho lokuchibiyela kathathu lahlulwa kuwona womathathu amawadi.
Lesi sigceme saseMbalenhle sinabantu abaningi abakhuluma isiZulu, okukhombisa ukukhula kwamandla e-MK nasezifundeni ezikhuluma isiZulu ngaphandle kwaseKZN.
Leli qembu libe nemibuthano eminingi emalokishini akhethiwe eGauteng agcwele izakhamuzi ezidabuka eKZN.
Umphumela wokhetho lokuchibiyela uphinde waveza isithombe i-MK esizakhele sona okhethweni lokuchibiyela oPhongolo enyakatho ne-KZN lapho ibonakala ithola ukwesekwa abalandeli be-ANC ne-EFF.
Abalandeli beqembu le-MK inqwaba yabo babengamalungu e-ANC bagxuma bajoyina i-EFF kaJulius Malema njengamanje sebebona iqembu le-MK njengekhaya labo elisha.
Lokhu kubeka engcupheni enkulu ukukhula kwe-EFF ebikhankasela ukuba ngelinye lamaqembu amakhulu eKZN.
Leli qembu selibukeka lingelesine ngobukhulu ngemuva kwe-IFP, i-ANC neDA.
I-DA ekhankasa KwaZulu-Natal iholwa yiMeya yoMkhandlu waseMngeni uChris Pappas okhuluma isiZulu othanda umdanso wesintu ophinde wabamba iqhaza ekuthuthukiseni imiphakathi yabantu abamnyama ngaphambi kokuthi kuqhamuke i-MK kaZuma.
Phambilini uPappas uthe i-MK iyizimbangi kodwa mancane amathuba okuthi ithole amavoti amaningi esifundazweni.
“Kodwa bazothola inqwaba yamavoti ku-ANC kulolu khetho. Sibone amavoti amaningi ephuma kubona. Ngicabanga ukuthi i-ANC isenkingeni kodwa-ke kuseyiqembu elisha futhi siwabonile la maqembu amasha eqhamuka njenge-COPE ngaleso sikhathi futhi abantu bewathakasela. Kodwa uma uqala ukucabanga ukuthi ngobani abaholi, ubani obamele yiziphi izinhlaka yilaphoke abantu bezoqala ukuncipha.”
Khonamanjalo abalandeli be-ANC nabe-MK bazohlangana komunye umshudulwisano ngomhlaka-5 kuNdasa lapho i-ANC iphonsela khona inselelo yokusetshenziswa kwegama loMkhonto weSizwe, imibala yeqembu nophawu lwayo. I-ANC ithi lezi zinto ziyingxenye yophiko lwayo lwezempi olungasekho.