Lubhalwe ngu-Dylan Bettencourt
Inhlangano yebhola eNingizimu Afrika ihlela inkontileka yonyaka owodwa kuHugo Broos ngemuva kokuthi iBafana ifinyelele esigabeni sokukhishwa seNdebe Yomhlaba.
Abadlali bakudala bayayisekela imibono yokuthi aqhubeke, njengoba imidlalo yokuhlungela i-Afcon iqala ngoMandulo kanti ukufunwa komuntu ozongena esikhundleni sakhe akukacaci.
Inhlangano yebhola eNingizimu Afrika (SAFA) ihlela ukunikeza uHugo Broos elinye ithuba lonyaka njengomqeqeshi weBafana Bafana.
Le nkontileka entsha izomenza aqhubeke nokuhola iqembu ngesikhathi somkhankaso we-Africa Cup of Nations ka-2027, ngokusho kwe-GOAL.
UBroos wayeseshilo ukuthi angase athathe umhlalaphansi ngemuva kweNdebe Yomhlaba ye-Fifa, kanti i-SAFA yayisivele iqale ukufuna umqeqeshi omusha.
Kodwa manje i-SAFA ifuna ukugcina iqembu lizinzile ngemuva kokuthi uBroos ehole i-Bafana yafinyelela esigabeni sokukhishwa seNdebe Yomhlaba okokuqala ngqa.
Inkontileka yakhe yamanje bekufanele iphele kule nyanga.
Abadlali bakudala beBafana, uTeko Modise noJosta Dladla bayakusekela lokhu.
UModise uthe uBroos wakha ubudlelwano obuqinile nabadlali bakhe futhi uyazi ukuthi angakhipha kanjani okungcono kakhulu kubona.
“Ufuna umqeqeshi abadlali abangazwana naye,” kusho yena etshela i-SABC Sport.
UDladla uncome uBroos ngokwethemba abadlali abasha nabangaziwa kakhulu.
“Kuvele abadlali abasha futhi abadlali abangaziwa bangena benokuzethemba,” kusho yena. “Uma ehlala, lokho kuyinto enhle.”
Le nkontileka entsha engase ibekhona iphakamisa imibuzo mayelana nokufuna kwe-SAFA umuntu ozongena esikhundleni sikaBroos.
Kuthiwa ikomiti yayo yezobuchwepheshe yayisivele ihambe ibanga elide kulolu hlelo. Owayengumqeqeshi weBafana uPitso Mosimane naye wayehlotshaniswa nalo msebenzi.
INingizimu Afrika izoqala imidlalo yokuhlungela i-AFCON ka-2027 ibhekene neGuinea-Conakry ne-Eritrea ngoMandulo.
Esithombeni esingenhla: UHugo Broos uhole iBafana Bafana yaya esigabeni sokukhishwa kwamaqembu (knockout stages) seNdebe Yomhlaba yeFIFA ka-2026.
Umthombo wesithombe: File