Lubhalwe nguCelani Sikhakhane
UMengameli kaKhongolose uMnuz Cyril Ramaphosa nephini lakhe uMnuz Paul Mashatile bamatasa nezinkonzo nabathandazi njengoba iqembu labo libhekene nempi yokubalekelwa amalungu nemibango esezinkantolo.
Lokhu kugqame kusukela ngempelasonto njengoba uRamaphosa ebehla enyuka ecela imikhuleko emabandleni ahlukene e-Eastern Cape.
Kwenye inkonzo okungeyamaWeseli ubonakale ephelezelwa uSihlalo wase-Eastern Cape uMnuz Oscar Mabuyane beqhuma phezulu ngezihlabelelo zebandla.
Ngakolunye uhlangothi uMashatile ubonakale nezangoma nabathandazi bephahla beshunqisa nempepho becela amadlozi kaKhongolose abenalo mbutho osezinkingeni.
Le nhlangano ibhekene nokulaxazwa amalungu nabaholi abaqavile abajoyina ezinye izinhlangano, ikakhulukazi uMkhonto weSizwe owesekwa uMnuz Jacob Zuma.
KwaZulu-Natal amakhansela ayo ashiya ubuthaphuthaphu ajoyina uMkhonto weSizwe amanye ahlubukela ku-IFP.
Muva nje eMzumbe amakhansela alaxaze uKhongolose ajoyina uMkhonto weSizwe kwathi eNewcastle ajoyina i-IFP kwaze kwalahleka amawadi awela eNkatheni.
Ngisho abaholi beNdabuko bashiya ubuthaphuthaphu njengoba omunye wabo kuyiphini likaNdunankulu kaZulu iNkosi yaseMadungenu, uMnuz Phathisizwe Chiliza osesohlwini labaholi boMkhonto weSizwe abazongena eSishayamthetho saKwaZulu-Natal.
Ngisho abaholi bezifunda bakhathazekile ngokushiwa amalungu abeqavile eqenjini.
USihlalo wesifunda iHarry Gwala, uMnuz Zamo Nxumalo unxuse amalungu kaKhongolose ngempelasonto ukuba asebenzise izinkonzo zephasika ukukhuleka ngamandla. Uthe akungabibikho ozohlala ekhaya kodwa abantu abaye ezinkonzweni zangakubo bakhulekele i-ANC.
“Siyacela maqabane ukuba wonke umuntu abheke enkonzweni yakhe noma yangakubo ayokhulekela umbutho wethu ngoba sibhekene nempi enkulu,” kusho uNxumalo.
Kuyimanje uKhongolose ubhekene nempi yasezinkantolo lapho elwisana khona noMkhonto weSizwe okubangwa kuwo igama nemibala abathi ithathwe kubo abe-ANC.