Lubhalwe nguBuziwe Nocuze
UPamella Kwepile waseNyanga, eKapa, waqala iqembu le-netball ngo-2021 ukusiza ukuvimba izingane ekubeni uvanzi.
“Ngabona ukuthi izingane zinesikhathi esiningi sokuphumula futhi azazi ukuthi zenzeni. Ezinye zazo zigcina zenza izinto ezingalungile,” kusho uKwepile.
“Inhloso yokusungula iqembu le-netball ukuzama ukubasiza ekutheni babe ngabantu abangcono abazokwazi ukukhetha kangcono empilweni. Bazokwazi ukuhlukanisa phakathi kokubi nokulungile.”
Baqala amaseshini abo okujima ngo-4.30 ntambama kusukela ngoMsombuluko kuya kuLwesihlanu futhi badlale imidlalo njalo ngezimpelasonto.
“Sisadonsa kanzima futhi siyafisa ukuthola abaxhasi ngoba uma sizodlala ngaphandle kwendawo yethu, sidinga imali yokugibela, ama-tracksuit namabhola,” kusho uKwepile.
Ezinye zezingqinamba intsha ebhekene nazo ukukhulelwa, utshwala nokusebenzisa izidakamizwa.
U-Image Tyalana, ongumfundi, ubonga uKwepile ngokuqhamuka necebo lokubasiza.
“Isikhathi esiningi siba nesizungu futhi asazi ukuthi senzeni. Sigcina sesithatha izinqumo ezingalungile. Abazali bethu badlala indima yabo kodwa uma sifika emgwaqeni sihlangane nezinye izingane sikhohlwe yizinto esifundiswe zona,” kusho uTyalana.
UKungawo Bini (45) ongumzali, uthe badinga abantu abafana noKwepile.
“Singabazali siya emsebenzini ekuseni sibuye sekuhwalele. Okungenani manje siyazi ukuthi badlala i-netball futhi bazobuyela ekhaya benze umsebenzi wabo wesikole,” kusho uBini.
Esithombeni esingenhla: UPamella Kwepile uqale iqembu le-netball ukuze asindise intsha ngemuva kokubona ukuthi inesikhathi esiningi sokuphumula ingenzi lutho.
Umthombo: Sithunyelwe