Lubhalwe nguZukile Majova
Umhleli Wezepolitiki
Umholi weqembu loMkhonto Wesizwe uJacob Zuma usephinde waletha uJesu Kristu noNkulunkulu emkhankasweni wakhe wokuthola amavoti ngaphambi kokhetho olubucayi.
Utshele abalandeli be-MK ngaphandle kweNkantolo eNkulu yaseThekwini ukuthi ukungavoteli i-MK kuzovusa ulaka lwamadlozi, indodana kaNkulunkulu noNkulunkulu uqobo.
UZuma uthe umkhankaso we-MK wokuthatha uhulumeni wezwe egameni labampofu unezibusiso zokhokho base-Afrika namazulu.
“Izingelosi zasezulwini nokhokho bethu abangasekho bayabona ukuthi manje sekuyisikhathi sokuthi abantu abamnyama bakhululeke ngokuphelele.
“Ngakho-ke, uma uphikisana nathi manje, uzodideka kangangokuthi ngeke uze uziqonde; bakwethu niphikisana nokhokho bethu, niphikisana nezingelosi, niphikisana neNdodana kaNkulunkulu, niphikisana noNkulunkulu uqobo,” kusho uZuma.
UMsholozi usho lokhu njengoba kungelinye lamasonto angcwele ekhalendeni lamaKrestu lapho amakholwa esezogubha khona iSidlo Sakusihlwa Sokugcina, uLwesihlanu lwePhasika kanye neSonto lePhasika.
Phambilini ngesikhathi uZuma esanguMengameli we-ANC, wathi i-ANC izobusa kuze kube uKristu ubuya okwesibili.
“Ngizwa abantu bekhononda uma sithi i-ANC izobusa ngokugcwele kuze kubuye uJesu kodwa sibusisiwe. Abefundisi basikhulekele,” lokhu wakusho ngesikhathi kunomkhankaso wokungena indlu nendlu e-Tshwane ngo-2015.
Enkulumweni yakhe yangoLwesithathu, uMsholozi uphinde wathi i-MK ifuna kuphele ukuvota kwabantu ngasese.
Uthe kunetulo lokuqola ukhetho, oluzoqala ngokwandisa amavoti ngokwengeza izipoki.
“Uyabona-ke phakathi kwezinto eziningi esizozishintsha yilento yokwenza ivoti lomuntu libe imfihlo.
“Kungani ivoti lakho kumele libe yimfihlo?
“Ngenxa yokuthi singama-MK lapha, sivota njengeqembu labalandeli be-MK futhi siyaziqhenya ngokuba uMkhonto.
“Pho kungani uma kubalwa, kuphinde kwenziwe ngasese?” kusho uZuma ebuza isixuku sabalandeli be-MK.
Esithombeni esingenhla: OwayenguMengameli wezwe uJacob Zuma ekhuluma nabalandeli beqembu le-MK ngaphandle kweNkantolo eNkulu yaseThekwini.
Umthombo: Sihle Mavuso/Scrollla.Africa