Lubhalwe nguLinda Ximba
Ngemuva kwezinyanga zokuqagela ngabalingisi abasha be-Real Housewives of Durban, i-Showmax yethule abalingisi abahle abakulungele ukuzohlobisa omabonakude bethu.
Uhlelo oluzokhonjiswa ngomhlaka 1 kuNhlolanja lunamalungu amasha amathathu azovala isikhala sikaThobile “MaKhumalo” Mseleku, uNonkanyiso LaConco noLondie London.
Laba besifazane abasha baseThekwini nguMaria Valaskatzis, uMbali Ngiba noSlindile Wendy Ndlovu.
“Abalingisi abasha bazoletha konke okuhle, ubukhazikhazi, ukuzazi kanye nezindaba esizithandayo nesizilindele kulolu hlelo,” kuthembisa i-Showmax.
Omama bemizi abasha abathathu bajoyina abalingisi ababuyile u-Annie Mthembu, uJojo Robinson, uNonku Williams noSorisha Naidoo.
Abalingisi abasha banezichazingabo ezihlaba umxhwele. UMaria ungumethuli kumabonakude aphinde abe umdidiyeli kanye nombhali. Uphinde abe umqondisi wesikhungo sezindaba nezokuxhumana ku-MV Consulting futhi ungumnikazi wenkampani ekhiqiza amavidiyo i-VKATZPK Media.
USlindile uneziqu ze-human resource futhi unolwazi lokuhlela imicimbi kanye ne-interior designing. Uphinde abe ngumsunguli wenkampani ephethe imicimbi i-Mawesi Consulting.
UMbali ungumculi nomlingisikazi futhi ungumsunguli we-African Centric Designs.
Ukwethulwa kwesizini yokuqala yango-2021 kwenze ukuthi lolu hlelo lube nababukeli abaningi ngosuku lokuqala ku-Showmax kanye naku-Twitter futhi lalibukwa cishe njalo ngoLwesihlanu, kanti lwaba ngolunye lwezinhlelo ezabukwa kakhulu ku-Showmax ngalowo nyaka.
Yaqhubeka nokukhonjiswa eMelika ku-Bravo okuyikhaya lokuqala lohlelo lwe-Real Housewives kanye nenkundla yokusakaza ye-NBC Universal i-Peacock.
Esitatimendeni i-Showmax ithe: “Uma sibheka ubukhulu nodumo lwabesifazane baseThekwini i-Real Housewives of Durban, abasanda kufakwa banethemba lokuthi ukuba khona kwabo kulolu hlelo ngeke kugcine ngokubanikeza amathuba amasha kodwa kuzophinde kusize ekuzikhuliseni nasekukhuthazeni abesifazane abaningi ababuka uhlelo.”
Esithombeni esingenhla: Abalingisi be-Real Housewives of Durban besizini yesithathu
Umthombo wesithombe: Showmax