Hlangana namaBhokobhoko: Kumdlali ophathe ibhola ezandleni isikhathi esingeqile kumzuzu owodwa noma emibili kulo nyaka, uGrant Williams wenze izimangaliso.
UGrant Williams uthathe izintambo kuFaf de Klerk sekusele imizuzu embalwa ukuthi umdlalo uphele kodwa umthelela wakhe ube nezithelo ezinhle.
Akwenzile esuka emugqeni wakhe wamayadi amahlanu kuzobonakala kuma-showreels emhlabeni jikelele amashumi eminyaka. Ukuthinteka kweqakala likaFinn Russell okuye kwamvimba ekutheni ashaye i-try enkulu.
Kodwa lolo hlobo lokudlala alulusha kuWilliams. Ijubane lakhe nokunyathela kwakhe sekukaningi kumenza ashelele kulandelana uma esebheke emgqeni we-try.
Udlale umdlalo wakhe wokuqala ephuma ebhentshini ngesikhathi amaBhokobhoko ehlulwa ngo 12-13 edlala ne-Wales e-Bloemfontein nyakenye.
UWilliams akazange abe nayo indlela elula yokungena kumbhoxo okhokhelwayo futhi ubonga umndeni wakhe nomphakathi ngokumeseka.
“Kwakunezingqinamba, kodwa kwadingeka ukuthi ngizimisele. Kufanele ngibonge umndeni wami kanye nabantu base-Paarl. Bayalwazi uhambo lwami njengoba bangeseka ngesikhathi izinto zingahambi kahle,” kusho uWilliams phambilini.
Ukuqala kwakhe ukuhlolwa bekufanele kube isikhathi sakhe esikhulu sokuzakhela udumo.
Esikhundleni salokho waba enkundleni imizuzwana eyishumi ngesikhathi uJuan Cruz Mallia wase-Argentina emdlalisa kabi emqumba phansi. UMallia wamiswa ngesikhathi uWilliams ephuma enkundleni ngohlaka.
UWilliams ukhuluma ngokuthi i-Paarl iyisizinda esihle sabadlali bebhola lombhoxo futhi akanaphutha.
Ozakwethu bamaBhokobhoko kwiNdebe yoMhlaba uKurt-Lee Arendse, uGrant Williams kanye noCanan Moodie bonke bavela kulelo gugu lase-Cape Winelands.
U-Arendse noWilliams babefunda ndawonye esikoleni samabanga aphansi iPaulus Joubert Primary. UChester Williams ongasekho naye uqhamuka e-Paarl.
Uhambo lukaGrant ukuya ezingeni lamazwe ngamazwe luthathe isikhathi eside kunabaningi ngoba akazange ahlolwe ngemuva kokudlalela i-Paarl Gymnasium. Wadlala umbhoxo wamaqembu iminyaka emithathu eThekwini ngaphambi
kokuthi aqashwe amaSharks.
Njengoba aqala ukudlala esigabeni esiphezulu ngo-2021, uWilliams (27) akaseyena umuntu osemusha kodwa ungomunye wabadlali bamaBhokobhoko abathembisayo. Angase avele njengesihlabani seNdebe yoMhlaba yakulo nyaka.
Esithombeni esingenhla: UGrant Williams
Umthombo wesithombe: SA Rugby