Lubhalwe ngu-Anita Dangazele
Wonke amaphoyisa ayisishiyagalolunye amisiwe ahlale ekomitini elihlola amathenda elagunyaza inkontileka yezempilo ka-R228m exhunywe noCat Matlala.
La maphoyisa aboshwa ngoNdasa noMatlala nezikhulu eziphezulu ezingu-12 ngamacala okukhwabanisa, inkohlakalo nokushushumbisa imali.
Amisiwe emsebenzini amaphoyisa ayisishiyagalolunye ngezinsolo zokuthi abe neqhaza ekugunyazeni inkontileka yezempilo eyamaniswa nosomabhizinisi oboshiwe uVusimuzi “Cat” Matlala.
Bonke abayisishiyagalolunye bahlala ekomitini lokuhlola amabhidi lakwa-SAPS elagunyaza isivumelwano.
Lokhu kumiswa kulandela ukuboshwa kwabasolwa ngoNdasa, lapho i-IDAC, i-Investigating Directorate Against Corruption, ithwesa uMatlala, izikhulu zamaphoyisa ezingu-12, umqondisi wenkampani nezinkampani ezimbili ngamacala okukhwabanisa, inkohlakalo nokushushumbisa imali. Ababoshiwe bahlanganisa ujenene omkhulu, ama-brigadier kanye no-colonels.
Amaphoyisa aseNingizimu Afrika akuqinisekisile ukumiswa kwalaba ngoLwesihlanu.
La maphoyisa asolwa ngokunikeza inkampani kaMatlala, iMedicare24 inkontileka ngokungemthetho.
“Amalungu athintekayo amisiwe emsebenzini njengoba kusalindwe ukuphothulwa kophenyo lokuqondiswa kwezigwegwe,” sifundeka kanjalo isitatimende.
Inkontileka yayihloselwe ukuhlinzeka ngama-medical screenings, wellness checks, ama-pre-employment examination kanye ne-injury-on-duty kumalungu e-SAPS eminyakeni emithathu. Ibekelwe u-R360million yagcina iklonyeliswe ngo-R228 million.
I-Medicare24 kusolakala ukuthi iphazamise amabhidi ingenazo izicucu ezidingekayo, okusho ukuthi bekungafanele neze icatshangwe.
Umbuso uthi ithenda ibingekho emthethweni zisuka nje. I-SAPS yawukhangisa ngomhlaka-31 kuMasingana ka-2024 nosuku lokuvala langomhlaka-19 kuNhlolanja ngaphansi kwenani elincane lezinsuku ezingu-21 elidingwa yimithetho yoMnyango Wezezimali Kazwelonke.
Akukho mvume etholiwe ukuze kufinyezwe isikhathi, futhi i charge sheet lisola ukuthi inkontileka ibingaphuthumi .
Izinkampani ezingamashumi amabili nambili zithumele amabhidi. IMedicare24 iyona kuphela ehambe nenkontileka.
Amaphoyisa aboshwe nabanye abasolwa bangaphandle ngebheyili ephakathi kuka-R40 000 no-R80 000. UMatlala usagqunywe esitokisini saseKgosi Mampuru II Correctional Centre, lapho elahle khona isicelo sebheyili kwelinye icala.
Osesithombeni esingenhla: uVusimuzi “Cat” Matlala kanye nabekwe naye amacala ngesikhathi bevele enkantolo ngaphambilini.
Umthombo wesithombe: @TheTruthPanther/X