Lubhalwe nguPalesa Matlala
Amaphoyisa azingela oshayasibhamu abangaphezu kuka-10 ngemuva kokubulawa kwabantu abangu-12 kwalimala abayisishiyagalolunye esigamekweni sokudubula esenzeka eCleveland.
- Kushone abantu abangu-12 ngemuva kokuthi oshayasibhamu begasele emijondolo yakwaJumpers eCleveland bavulela ngenhlamvu bebhekise kubahlali.
- Amaphoyisa athi abasolwa abangaphezu kuka-10 babaleke ngemoto yohlobo lweToyota Quantum emhlophe ngemuva kokuhlasela abantu ezindaweni eziningi.
Kushone abantu abangu-12 esigamekweni sokudubula esinyantisa igazi emijondolo yakwaJumpers eCleveland e-East Rand.
Abanye abayisishiyagalolunye balimala baphuthunyiswa ezibhedlela ezahlukene e-East Rand ngemuva kokuthi oshayasibhamu begasele emijondolo ngaphambi kwamabili ngoLwesibili.
Uphiko lwamaphoyisa aseNingizimu Afrika luthe lokhu kuhlasela kwenzeka ngezithuba zabo-11:10 ngomhlaka-9 kuNhlangulana ka-2026.
Amaphoyisa afike endaweni yesigameko afica abantu abaningi bedindilizile benamanxeba okudutshulwa.
Abezimo eziphuthumayo be-Emergency Medical Services (EMS) babizelwe ukuzolapha abalimele futhi babayise esibhedlela.
Okhulumela amaphoyisa aseGauteng, uCaptain Tinswalo Sibeko, uthe amadoda angu-8 asebekhulile nabesifazane abathathu bahlonzwe njengabashonile endaweni yesigameko.
“Isisulu sesi-12, indoda endala, ishonele esibhedlela kamuva. Imbangela yokuhlasela ibingakaziwa,” kusho uSibeko.
USibeko uthe imbangela yokuhlasela ibingakaziwa.
Uqhube wathi ukholwa wukuthi abasolwa abangaphezu kuka-10 behliswe eduze kwegalaji likaphethiloli eCleveland ngeToyota Quantum emhlophe.
Oshayasibhamu kuthiwa bangene emijondolo bavulela ngenhlamvu.
“Babe sebedlulela kule ndawo bavulela ngenhlamvu bebhekise kubahlali namalungu omphakathi ezindaweni eziningi,” kusho uSibeko.
Ngemuva kwalesi sigameko kuthiwa babaleke ngemoto eyodwa yohlobo lweToyota Quantum emhlophe.
Akukaboshwa muntu, amaphoyisa aphume umkhankaso wokuthungatha acela usizo lomphakathi.
Kutshalwe abaseshi bezifundazwe nezifunda, amaphoyisa ophiko lwezobunhloli kanye nongoti bezobunhloli ukuze baphenye ngalesi sibhicongo futhi balandelele ababulali.
Noma ubani onolwazi angashayela i-Crime Stop ku-08600 10111 noma athumele indlebe ngokungaziwa ngohlelo lokusebenza lweselula lwe-MySAPS.
Esithombeni esingenhla: I-tape yamaphoyisa
Umthombo wesithombe: Ifayela