Lubhalwe nguBuziwe Nocuze
Izakhamizi zaseQandu Qandu zithi zibuze ukuthi kungani ukudla okunikelwe nezingubo zokulala kwabelwa izindawo ezingathintekile kangako ngemuva kwezikhukhula zaleli sonto.
Ikhansela laku-ward 93, uThando Pimpi, liyaphika ukuthi lisabisa izakhamizi futhi lithi bonke abahlukumezekile ehholo bebelufanele usizo.
Abakhahlanyezwe yizikhukhula eQandu Qandu bathi baphume ehholo lomphakathi babuyela emijondolo ebigcwele amanzi ngoba bengasaphephile.
Izakhamuzi zasemijondolo yaseKhayelitsha zithuthiwe ngemuva kwezikhukhula zaleli sonto. Bathole amaphasela okudla, izingubo zokulala nesobho kwiKhayelitsha Development Forum, uShoprite kanye neGift of the Givers.
ULulamile Gwadiso uthe iQandu Qandu ishayeke kakhulu kuneZone 14 nePhase 3, zonke eGreen Point.
Uthe izakhamuzi zithukile ngesikhathi kufika abantu bakwezinye izindawo bezithola izinto.
“Sithukile sekufika abanye abantu bezohlomula okuthe uma sibabuza bathi ikhansela lewadi yabo labatshela ukuthi beze bazolanda iminikelo ngoba uyena owenza sithole yonke into,” kusho uGwadiso.
Uthe m babuza ikhansela lakuWadi 93 uMnuz Thando Pimpi ngale minikelo base besatshiswa.
“Njengomholi bekungafanele asisabise ngoba ungumholi wethu futhi sinelungelo lokumbuza,” kusho uGwadiso.
UNosipho Hlakana uthe abanye baphume ehholo lomphakathi ngemuva kwezinsolo zokusatshiswa.
“Ngemuva kokuthi ethe uzosithola ngamunye ngamunye asizange sizizwe siphephile ukuqhubeka nokulala ehholo lomphakathi,” kusho yena.
Uthe baphindele endaweni egcwele izikhukhula ngemuva kokuzwa ukuthi izakhamizi ezivela ezingxenyeni ezimbili zingase zibahlasele.
UHlakana uthe uPimpi uphinde wabatshela ukuthi usayina amaphepha eDolobheni laseKapa ukuze alethe izidingo.
“Ukusitshela ukuthi angeke sithole lutho kungenye indlela yokusabisa,” kusho yena.
UPimpi uphikile ukuthi ubesabisa noma ngubani. “Angizange ngisabise muntu,” esho.
Uthe abahlaselwa yizikhukhula baseQandu Qandu, eZone 14 noPhase 3 bonke batshelwe ukuthi baye ehholo lomphakathi.
“Bekungeyona eyendawo ethile kuphela imnikelo,” kusho uPimpi.
UPimpi uthe abaholi beQandu Qandu bathathe isinqumo esingesihle ngokuhlukanisa abakhahlanyezwe yizikhukhula baphinde baphume ehholo.
“Ngibatshelile ukuthi wonke umuntu osehholo lomphakathi uzohlomula ngeminikelo ngoba bonke bayizisulu zezikhukhula,” usho kanje.
Esithombeni esingenhla: Abahlali baseQandu Qandu eKhayelitsha bathi ikhansela lewadi yabo libasabise ngokungalethwa kwezidingongqangi ngemuva kokulwa ngeminikelo yezikhukhula.
Umthombo wesithombe: Sithunyelwe