Lubhalwe ngu-Anita Dangazele
Abantu bakwamanye amazwe abangaphezu kuka-8000 balungiselwe izinto zabo ukuze bayodlula eBeitbridge phakathi kwamasonto amabili, kuveza izibalo zikahulumeni .
INhloko ye-NATJOINTS uLieutenant-General Tebello Mosikili uthi amaphoyisa asemi ngomumo futhi ngeke alubekezelele udlame ngesikhathi abantu bebambe imashi.
Izinkulungwane zabantu bakwamanye amazwe sezivele zilifulathele elaseNingizimu Afrika, ngaphambi komnqamulajuqu wangoLwesibili obekwe yizinhlangano ezimelene nokufika kuleli ukuze abokufika abangenazo izincwadi bahambe.
Izibalo zikahulumeni zikhombisa ukuthi ukudingiswa kwabantu kukhuphuke ngo-46% eminyakeni emibili yezimali, kusukela ngaphansi nje kuka-58,000 ngo-2024/25 kuya ku-109,344 ekupheleni kukaNdasa.
Bangaphezu kuka-8,000 abantu abacutshungulwe ukuthi babuyiselwe emuva emngceleni weBeitbridge esikhathini esingaphansi kwamasonto amabili, ngokwezibalo ezibikwe yiFrance 24.
Ukusuka kwalaba kulandela izinsongo nodlame oluhambisana nemibhikisho emelene nokufika kwabantu bakwamanye amazwe. I-CNN ibike ukuthi isisebenzi sasengadini saseMalawi eGoli, uKaunga Nyirenda, watshelwa amadoda amabili ekuqaleni kukaNhlangulana ukuba aphume kuleli noma ahambe ngebhokisini ungakadluli umhlaka-30 kuNhlangulana.
Kuhlelelwe imibhikisho emikhulu ngoLwesibili eThekwini, eGoli, ePitoli, eKapa naseMalahleni.
Usihlalo weNational Joint Operational and Intelligence Structure uLieutenant-General Tebello Mosikili uthi amaphoyisa asemi ngomumo ngamamashi.
“Kulabo abahlose ukwephula umthetho kusasa, umyalezo wethu ulula: ningasivivinyi isinqumo soMbuso. Kulabo abahlose ukubhikisha ngokuthula, siyaniqinisekisa ukuthi amalungelo enu akumthethosisekelo azovikeleka,” kusho uMosikili.
Lesi sithangami siza ngemuva kwezinyanga zokushuba kwesimo, okuhlanganisa nokuhlaselwa kwabokufika ezingxenyeni eziningi zezwe.
Esithombeni esingenhla: Izinkulungwane zibaleke eNingizimu Afrika zisabela izimpilo zazo ngaphambi komnqamulajuqu wamhlaka-30 kuNhlangulana.
Umthombo wesithombe: Uhulumeni waseMalawi