UCelani Sikhakhane ukulethela izindaba zakamuva ezenzeka KwaZulu-Natal.
EMgungundlovu: UMnyango wezokuBusa ngokuBambisana neziNdaba zoMdabu KwaZulu-Natal kulindeleke ukuthi unikeze abaholi bomdabu abangu-36 izimoto kulesi sifundazwe. Lezi zimoto zingamaveni angu-30 aseqophelweni eliphezulu okuyi-4×4, abiza u-R19 million, anikezwe abaholi bomdabu ngesikhathi kuvulwa iNdlu yabaHoli boMdabu namaKhoisan oLundi ngenyanga edlule. UNgqongqoshe uThulasizwe Buthelezi utshele iCogta Portfolio Committee ukuthi iqoqo elilandelayo lalezi zimoto ezingu-36 lizodluliselwa ngenyanga ezayo ngoNhlangulana. Uphinde wedlulisa isimemo kumalungu ekomiti elibhekele ukusebenza kwabasebenzi bakwaCogta Portfolio Committee ukuthi ahambele umcimbi wokunikezelwa kwezimoto kuMakhosi ngoNhlangulana, eqinisekisa ukuzibophezela kukahulumeni ekuqiniseni isikhungo sobuholi bomdabu.
ECornubia: Imindeni engaphezu kuka-4 000 eyakhahlamezwe yizikhukhula ithole izindawo zokuhlala ezindaweni ezintsha ezakhiwe eCornubia, enyakatho yeTheku, ngoMsombuluko. Kulandela izikhukhula ezicekele phansi kule minyaka emithathu edlule, zontathu izinhlaka zikahulumeni bezisebenza ngokubambisana ukwakha izindlu ezizohlala abantu abakhahlanyezwe yizikhukhula. Ikakhulukazi njengoba iTheku yilo masipala othinteke kakhulu, iziphathimandla sezihlalise imindeni engaphezu kuka-4,000 kusukela ngo-2022 emafulethini aqashiwe aziwa ngeTransitional Emergency Accommodation (TEAs). Lokhu kulandela ukuvalwa kwawo wonke amahholo omphakathi abehlalisa izisulu zezikhukhula phambilini.
EMfolozi: UNdunankulu waKwaZulu-Natal, uThamsanqa Ntuli, uhlangane nabaholi bezenkolo kuso sonke isifundazwe ukudingida izindaba ezithinta ukuhlalisana kahle nokuvuselelwa kokuziphatha. Isidlo sasekuseni sikaPremier’s with Religious Leaders ebiseMfolozi Casino Hotel ngoLwesibili. Ngaphandle kokondla umzimba, isidlo sasekuseni sihambe ibanga elide ekondleni umphefumulo nengqondo yesifundazwe ngokugqugquzela izingxoxo ezakhayo mayelana nezinkinga ezikhungethe iKwaZulu-Natal nezindlela zokuzinqoba.
Esithombeni esingenhla: UNgqongqoshe wakwaCogta KwaZulu-Natal, uMfundisi uThulasizwe Buthelezi, osezonikezela ngezimoto ezingu-36 kubaholi bomdabu KwaZulu-Natal.
Umthombo wesithombe: Cogta