Lubhalwe nguPalesa Matlala
USthembiso Mdlalose uqale wavuma kabili ukuthi nguye owaqala umlilo eGoli ngaphambi kokuthi athi uqamba amanga ukuze athole indawo yokuhlala nokudla ejele.
Abasinde emlilweni wosindiso batshele inkantolo ukuthi bebevaleleke ngaphakathi ebhilidini allivutha kwadingeka ukuthi bagxume emafasiteleni bebalekela intuthu.
INkantolo yeMantshi yasePalm Ridge kulindeleke ukuthi ikhiphe isinqumo ecaleni likaSthembiso Mdlalose osolwa ngokususa umlilo ebhilidini losindiso eGoli.
Umlilo wadabula ibhilidi elinezitezi ezinhlanu eMarshalltown ngoNcwaba ka-2023 kwashona abantu abangu-76.
UMdlalose, oneminyaka engu-33 ubudala, wavuma ngoMasingana ka-2024 ukuthi waqala umlilo esitezi esiphansi ebhilidini.
Ngaleso sikhathi utshele abaphenyi ukuthi uzamile ukushisa isidumbu sowesilisa athi wambulala.
UMdlalose wavuma kabili ukuthi nguyena oqale umlilo. Ukuvuma okokuqala kwenziwa ngaphambi kwekhomishini ephenya ngale nhlekelele. Okwesibili kwenziwa phambi kwemantshi.
Kodwa ngesikhathi sokuqulwa kwecala, wayishintsha izikhathi eziningana inkulumo.
Kamuva wathi wayedle izidakamizwa ngesikhathi evuma. Uphinde watshela inkantolo ukuthi umshushumbisi wezidakamizwa waseTanzania wamphoqa ukuthi avume ukuthi nguye owaqala umlilo.
UMdlalose uphinde washintsha wathi uqamba amanga ngoba efuna ukuboshwa.
“Iqiniso liwukuthi, ngavuma lokhu ukuze ngiboshwe,” etshela inkantolo.
“Ngangifuna ukubalekela ukuba semgwaqeni futhi ngingenandawo yokufihla ikhanda. Bengicabanga ukuthi ijele lizonginika ithuba lesibili ngoba ngike ngabona abantu beya ejele babuye neziqu.”
Ngesikhathi uMdlalose ephekwa ngemibuzo nguMbuso, ucasuke waphuma enkantolo maqede wabuyela ezitokisini.
Abasinde emlilweni banikeze ubufakazi obuthinta inhliziyo ngesikhathi kuqhubeka icala. Abanye bathi ukuphuma kwakunzima njengoba kwakugcwele intuthu ebhilidini. Abanye bathi abantu bagxume emafasiteleni bebalekela ilangabi.
UMdlalose ubhekene namacala angu-76 okubulala, angu-12 okuzama ukubulala nelilodwa lokushisa.
Osesithombeni esingenhla: USthembiso Mdlalose ngesikhathi evela enkantolo yeMantshi yasePalm Ridge.
Umthombo wesithombe: Isithombe sefayela