UCelani Sikhakhane ukulethela izindaba ezenzeka KwaZulu-Natal.
OKhahlamba: IDemocratic Alliance kuMasipala wasoKhahlamba, eDrakensberg, isibhalele uNgqongqoshe wezokuBusa ngokuBambisana neziNdaba zoMdabu KwaZulu-Natal, uMnuz Thulasizwe Buthelezi, icela ukuthi kuthathwe izinyathelo eziphuthumayo mayelana nokusetshenziswa kwemali okungagunyaziwe nokumosha imali engaphezu kuka-R20 million embikweni kaMasipala weKomidi lezokuBusa ngokuBambisana neziMali zoMphakathi. Ikhansela uMeshack Mlangeni uthe kunesizathu sokukholelwa ukuthi kungenzeka kube nezinkinga ezinkulu zezimali.
E-Estcourt: INkantolo yesiFunda yase-Estcourt igwebe uSabelo Khumalo oneminyaka engu-36 ubudala iminyaka engu-95 ebhadla ejele ngamacala okudlwengula nokugebenga izindlu eNtabamhlophe naseWembezi phakathi kuka-2021 no-2023. UKhumalo utholwe enecala lokuhlasela abesifazane abahlanu abaneminyaka ephakathi kuka-15 no-36 ezigamekweni ezahlukene. Wangena ezindlini zabo wabadlwengula wantshontsha nezimpahla zabo. Ugwetshwe iminyaka engu-75 ngokudlwengula neminyaka engu-20 ngokugqekeza.
Pietermaritzburg: INkantolo eNkulu yaKwaZulu-Natal, eMgungundlovu, igwebe uNtando Khanyile (24) udilikajele kabili ngamacala amabili okubulala. NgoLwezi ka-2024, uKhanyile wabulala izelamani uGoodman Mchunu, (55) noNgenisile Mchunu (78) eMuden ngemuva kokukholelwa ukuthi isihlobo sakhe sithathe imfuyo yomndeni wakhe. Udubule uGoodman ngemuva kokuthi umhlangano ungenzeki. Ngemva kwezinsuku ezine, wadubula uNgenisile ngesikhathi eze emngcwabeni. Wabaleka waboshwa amaphoyisa ngemuva kwamasonto.
Esithombeni esingenhla: IDemocratic Alliance isicele uNgqongqoshe uThulasizwe Buthelezi ukuthi athathele izinyathelo ngokusetshenziswa kuka-R20 million kuMasipala wasoKhahlamba.
Umthombo wesithombe: KZNCogta