Lubhalwe ngu-Everson Luhanga
Izakhamuzi ezingaphezu kuka-600 zase-Diepsloot zihlangane ndawonye zavimba amaphoyisa amane ngeSonto eziwasola ngokufumbathiswa endaweni.
Iqulu labantu livale umgwaqo ngamatshe amakhulu kwavaleleka amaveni amabili amaphoyisa ekhoneni, kwaze kwafika amanye amaphoyisa.
La maphoyisa aqale ukusolokala ngesikhathi ilungu lomphakathi libona elinye lawo lilokhu lidlula ngokusolisa endaweni yowesilisa owaziwa ngokudayisa utshwala ngaphandle kwemvume. Ngokushesha lajoyinwa uzakwabo wesibili.
Isakhamuzi sazise omunye oyilungu leforamu yomphakathi yendawo (CPF).
Bendawonye baqaphe la maphoyisa abawasola ngokuthi bawabone efumbathiswa.
Ngesikhathi iveni yokuqala enamaphoyisa amabili isendaweni, kufike enye iveni enamaphoyisa amabili.
Izakhamuzi zishaye impempe zihlaba umkhosi.
Akuphelanga mizuzu emingaki avinjwa amaveni.
Umphakathi ucele usizo olwengeziwe futhi ngokushesha iqulu labantu lahlangana. Bekunabantu abangaphezu kuka-600 abebecula izingoma zomzabalazo ngesikhathi bevimba amaveni amaphoyisa.
Njengoba umphakathi ucele usizo kuzakhamuzi, namaphoyisa nawo acele usizo kozakwabo.
Sikhuluma ne-Scrolla.Africa isakhamuzi esicele ukungadalulwa ngoba sesaba ukuhlukunyezwa sithe siyingxenye yabavimbe la maphoyisa.
Umsolwa uthe kufike amaphoyisa ophiko lwe-TRT, ahlakaza umphakathi avumela amaveni amabili ukuthi asuke endaweni.
Ngesikhathi amaphoyisa ephuma kule ndawo abephelezelwa yisixuku esishaya izimpempe sizwakalisa ukucasuka kwaso kwabomthetho.
Uthe ngoMgqibelo umphakathi ube nomhlangano nabaphathi besiteshi samaphoyisa lapho umphathi wesiteshi egcizelele khona ukuthi izakhamuzi kumele zidalule amaphoyisa akhohlakele.
“Umphathi wesiteshi usitshele ukuthi kufanele sithathe izithombe futhi sibe nobufakazi obubambekayo uma sithola izikhulu zamaphoyisa zibandakanyeka ezigamekweni zobugebengu.”
Amaphoyisa athathe izitatimende kubantu abaningi abathi babone amaphoyisa efumbathiswa base bebikela umphakathi.
Ngemva kokuvula icala, iveni yamaphoyisa ihambise iqembu ebelibukeka linqobile yalibuyisela lapho okwenzeke khona isigameko. Ngesikhathi sokushicilela, la maphoyisa amane abengakabekwa cala.
Kulo nyaka, izakhamuzi zakuleli lokishi ziqale uchungechunge lwemibhikisho oluholele ekuboshweni kwabaholi abane be-Diepsloot Community Forum.
Izakhamuzi bezivikela izenzo zobugebengu obudlangile elokishini lazo.
Umbhikisho waholela ekutheni kuze kufike uNgqongqoshe wamaphoyisa kuleli lokishi.
Laba baholi baboshelwe amacala okudala udlame emphakathini nokulimaza impahla phakathi kwamanye amacala. Icala elibhekene nabaholi lisasenkantolo yeMantshi yase-Randburg. Bonke banikezwe ibheyili.