Lubhalwe ngu-Anita Dangazele
I-ANC e-Eastern Cape iwuvikele umkhankaso wayo wokuqongelela imali yokhetho lwangomhlaka-29 kuNhlaba kodwa igxekwe kakhulu ezinkundleni zokuxhumana.
Iqembu licele amalungu nabalandeli balo ukuthi basayine ama-debit order noma benze iminikelo yokulisiza ngesikhathi sokhetho.
Kuze kube manje leli qembu selikwazile ukuhlanganisa imali elinganiselwa ku-R50 000.
Abasebenzisa izinkundla zokuxhumana bagxeke leli qembu ngokucela abalandeli balo ukuthi banikele ngesikhathi lesi sifundazwe singezinye ezihlwempu kakhulu ezweni elinesibalo esiphezulu sabantu abangasebenzi.
Umhlaziyi wenqubomgomo, uMnuz Nkosikhulule Nyembezi uthe kuyashaqisa ukuthi iqembu lizosebenzisa imali yabantu abaningi ukuxhasa umkhankaso walo wokhetho.
“Kudala imizwa exubile njengoba osopolitiki bezicebisa ngokukhuphuka izitebhisi bese beyeka ukuthuthukisa izinga lempilo yabantu ababavotela ezikhundleni,” kusho uNyembezi.
UMgcinimafa we-ANC esifundazweni uZolile Williams uthe akukho okubi ngomkhankaso wokuqoqa imali kubantu.
“Kumele ukhumbule ukuthi abasekho abaxhasi bamazwe ngamazwe. Kumele sithembele kithina ngokwethu, sincike kumalungu nabalandeli be-ANC.”
Uthe iqembu esifundazweni lisesimweni esihle kwezezimali futhi alinazo izinkinga.
UWilliams uthe iqembu lidinga imali yokuthutha amavolontiya kanye nokuphrinta izinsiza zokhetho kanye nokukhokhela ezinye izindleko ezingase zenzeke ngesikhathi sokhetho.
Amalungu nabalandeli abazange baphoqwe ukuthi banikele.
“Sidinga imali encane njengomnikelo ka-R10 kulabo abazimisele ngokunikela,” kwengeza uWilliams.
Esithombeni esingenhla: UMgcinimafa we-ANC e-Eastern Cape uZolile Williams.
Umthombo wesithombe: Facebook/ANC Eastern Cape.