Lubhalwe nguDoreen Mokgolo
- Uphatheke kabhlungu umndeni ngemuva kokuthi isibhedlela senqabile ukubanikeza izidumbu zezingane zabo esezishonile sathi abalethe ihlahla ukuze “balande imimoya yazo.”
- Umama osemusha, oneminyaka engu-15 kuphela ubudala, washonelwa amawele akhe, kanti manje umndeni ufuna izimpendulo mayelana nokuthi ikuphi ingane yesibili.
Usale ubambe ongezansi umndeni obusosizini ngemuva kokuthi isibhedlela i-Far East Rand Hospital siwutshele ukuthi ufike nehlahla ukuze “ulande imimoya” yamawele awo ashonile.
Emiphakathini yama-Afrika kuvamise ukuthi kube nesiko lokusebenzisa ihlahla elaziwa ngegama lesiZulu elithi “uMlahlankosi”. Igatsha lesihlahla lisetshenziselwa ukuqoqa umoya womuntu oshonile lapho okuphumele khona umphefumulo wakhe okokugcina.
Kungaba sesibhedlela noma endaweni yesigameko sengozi yemoto noma indawo lapho umuntu ebengashona khona ngokudutshulwa noma ukugwazwa.
Umndeni ubucele ukubona izidumbu zezingane bese wenza umngcwabo wangasese, kodwa isibhedlela senqaba.
Umama wamawele oneminyaka engu-15 ubudala wase-Daveyton wangeniswa mhlaka-25 esibhedlela esuka esesikoleni, enamasonto angu-25 ekhulelwe. Odokotela baxwayisa unina, uNelisiwe Mancele, ngokuthi kungenzeka zingasindi lezi zingane ngenxa yokuhluka kobukhulu bazo.
Esanda kulaliswa, umama osemncane washayela unina ucingo wabe esefaka izithombe ku-Facebook Messenger ekhombisa ukuthi ubelethe umntwana oyedwa.
“Ngithe uma ngibuza ngengane yesibili wathi umhlengikazi wayisa eyokuqala ewodini ngesikhathi engakazalwa eyesibili isaxhumene naye,” kusho uNelisiwe.
Umama omncane uthe ingane ibikhala kodwa wangakwazi ukuyibamba yaze yashona.
“Umhlengikazi ufike wayisusa ingane, wayidonsa ngonyawo, wangitshela ukuthi isishonile,” esho.
UNelisiwe kamuva wakhonjiswa esinye sezidumbu zezingane kodwa watshelwa ukuthi esinye sikwenye ingxenye yesibhedlela.
“Bathe abakwazanga ukukhipha izidumbu ngoba bezincane, kodwa esinye sinesisindo esingu-750g esinye singu-800g. Kuze kube yimanje asikayiboni ingane yesibili, futhi nginovalo lokuthi isibhedlela silahle isidumbu esisodwa ngaphandle kwemvume yethu,” esho.
Okhulumela isibhedlela uPhumza Ntuthuka ukuqinisekisile ukuthi umama osemncane ungeniswe esibhedlela.
“Ingane yokuqala yabelethwa iphila kodwa yayidinga usizo lwezempilo yaphuthunyiswa ophikweni lwezingane ezizelwe ngaphambi kwesikhathi, yashona engakapheli amahora angu-24. Ugogo usayine amafomu okushiswa kwazo zombili izingane, ngakho asikwazanga ukukhipha izidumbu,” esho.
Esithombeni esingenhla: Umgilwa nonina.
Umthombo wesithombe: Doreen Mokgolo