Iphupho leBafana Bafana lokuyadlala ku-Afcon lishabalele

Timmy T Maranda

Njengoba iBafana Bafana ibifisa ukuyodlala ku-African Cup of Nations ngowe-2022, lokho akubange kusenzeka njengoba iqembu lesizwe lilahle amathuba, ngesikhathi lihlulwa ngamabili eqandeni yiSudan e-Al Hilal Stadium, eSudan.

Yize bebedingeka ukudlala ngokulingana kulo mdlalo ukuze bebalwe namaqembu azodlala kwi-Afcon, iphupho leBafana Bafana lishabalele njengoba bengakwazanga ukuzimisela emdlalweni obubaluleke kakhulu, balandela amazwi owayenguMengameli wezwe, uJacob Zuma, owathi: “IBafana Bafana ihlale idlala kodwa ayidluleli phambili.”

Njengoba iSudan inqobile kulo mdlalo isidlulele phambili ku-Pool C ilandela iGhana. ISudan iyona eyawina lesi sicoco ngowe-1970, kanti kungokokuqala ngqa kusukela ngowe-2012 ukuthi idlulele phambili ku-Afcon.

U-Eldin Terry ujezise abadlali beBafana Bafana ebebedlala budlabha ukuze abeke iSudan phambili ngegoli alishaye ngekhanda ladida uRonwen Williams.

Nakuba elakuleli belizama ukuhlanganisa ukuphaselana okuhle, u-Mohamed Abdelrahman uphinde wabeka iSudan phambili ngesikhathi eshaya igoli. U-Abdelrahman udide ukaputeni uThulani Hlatshwayo ebhokisini ngaphambi kokushaya igoli elidlule phambi kukaRonwen Williams layongena phakathi ebhokisini.

ISudan ibuye ngamandla esiwombeni sesibili ngesikhathi iBafana isalwela ukuphaselana ibhola njengoba yenzile esiwombeni sokuqala.

Komunye umdlalo ka-Group C, iGhana inenebule iSao Tome, ngamagoli amathathu kwelilodwa ukuqinisekisa indawo esicongweni ngamaphuzu ayi-13 emidlalweni eyisithupha nokuqinisekisa ukuthi badlulela ku-Afcon ngesitayela.

Umthombo wesithombe: @BafanaBafana