Lubhalwe nguSelloane Ntshonyane
UJemina Modise usebenzela uMnyango Wamaphoyisa kaMasipala waseKurhuleni kanti usanda kuphothula iziqu zakhe zobuDokotela kwi-Business Management.
Manje usehlela ukuphakamisa abesifazane abangamaphoyisa kanye nokuqinisa ubuholi eMnyangweni kahulumeni.
UJemina Modise uyisikhulu esiphezulu eMnyangweni wamaPhoyisa kaMasipala waseKurhuleni (EMPD), kanti manje usengudokotela.
Iphoyisa likamasipala lisanda kuthola i-Doctorate in Business Management. Futhi akagcini lapho usethubeni lokuphothula iziqu zakhe zomthetho (law)kulo nyaka.
Abaphathi bakhe ku-EMPD bathi ungumgqugquzeli embuthweni futhi ungomunye wezihlabani zaseNingizimu Afrika ezithuthukayo kwezemfundo nocwaningo.
I-thesis kaModise’s Master’s ibihlola inkohlakalo emaphoyiseni kamasipala. Isihloko sakhe besithi-Perception of corruption in EMPD. Ulandele lokho ngocwaningo lukadokotela olunesihloko esithi-Developing a Model to Enhance Women Representation in Leadership.
Njengoba esephothulile iziqu zakhe zobudokotela, uModise ufuna ukusebenzisa ucwaningo lwakhe ukuze aqhubekisele phambili izinguquko zangempela kuhulumeni namaphoyisa. Uhlela ukugxila ezinhlelweni zobuholi kanye nokweseka abesifazane kwezomthetho. Ufuna nokufaka isandla ocwaningweni lwenqubomgomo kanye nokweluleka abesifazane abasebasha emsebenzini wamaphoyisa.
Uhambo lwakhe lwezemfundo luhlaba umxhwele. Uthole i-Diploma ye-Postgraduate in Public Management ngo-2012, i-Master of Business Management ngo-2015, kanye ne-Bachelor of Commerce in Law ngo-2020.
Bekungelula. UModise uthe bekunzima ngoba ubebhekwe umsebenzi wakhe, impilo yomndeni kanye nezifundo zakhe.
Isiqubulo sakhe simsize ekutheni ahlale ephokophele phambili: “Ungalokothi uqale into ungayiqedi.”
“Ngazikhumbuza ukuthi ngifuna ukuba udokotela wokuqala emndenini wami futhi ngibe yisibonelo ezinganeni zami nakozakwethu,” kusho yena.
“Ngaso sonke isikhathi lapho ngizizwa ngidangele, ngangizibona ngeso lengqondo ngiwela entanjeni ngigqoke ijazi lami lokuthweswa iziqu nokuziqhenya ebusweni bomndeni wami. Lowo mbono wanginika amandla okuqhubekela phambili.”
Uthe unina nomalumekazi wakhe yibona abamqoka empumelelweni yakhe.
“Umama ubelokhu engikhuthaza kakhulu. Ngambona ebuyela esikoleni ngokuhamba kwesikhathi, waqeda iziqu zakhe zobuthishela. Wangifundisa ukuthi ukuqina kunganqoba noma yiziphi izithiyo,” esho.
“Umalumekazi wami wabamba iqhaza elibalulekile ngokukhokhela ukubhaliswa kwami enyuvesi nokungikhuthaza ngezifundo zami.”
Esithombeni esingenhla: Iphoyisa likamasipala waseKurhuleni uJemina Modise uthweswa iziqu zakhe zobudokotela.
Umthombo wesithombe: Sithunyelwe