Lubhalwe ngu-Anita Dangazele
INkantolo yesiFunda yase-East London ifake uJulius Malema ejele ngokuphatha nokuqhumisa isibhamu ngokungekho emthethweni emcimbini.
Ithimba labameli baJulius Malema lizofaka isicelo sokubuyekezwa kwesigwebo eNkantolo eNkulu yase-Eastern Cape eMakhanda.
UJulius Malema uzobhadla ejele iminyaka emihlanu ngemuva kokuqhumisa isibhamu emoyeni emcimbini wokugubha usuku lokusungulwa kwe-EFF.
INkantolo yesiFunda yase-East London ithole uMalema enecala lokuphatha nokuqhumisa isibhamu ngokungemthetho.
Abantu abebehambele lo mgubho wepolitiki basibona lesi sigameko sokudubula.
IMantshi uTwanet Olivier iyona ekhiphe isigwebo. Uthe inkantolo ibhekisisile ukuthi icala libucayi kangakanani.
Imantshi iphinde yaveza ukuthi uMalema ubengakaze aboshelwe ubungebengu ngaphambi kwesigameko sokuqhumisa isibhamu.
U-Olivier uthe isigwebo sasejele kumele siveze ubulungiswa emphakathini siphinde futhi sikhombise nozwelo.
Ithimba labasolwa litshele inkantolo ukuthi ukuqhumisa isibhamu kwakuyingxenye yokubungaza umcimbi.
U-Olivier usinqabile lesi sizaba. Uthe ukudubula bekuyisenzo esihleliwe futhi akwenzekanga nje esthubeni.
Uthe isinqumo sokuqhunyiswa kwesibhamu sithathwe ngaphambi kokuthi umcimbi uqale. Uthe abaholi bezepolitiki bayaluvuma lolu hlelo.
“Kwakungesona isenzo sokuxhamazela. Kwakungeyona intukuthelo. Kwakuwukubungaza nje kusihlwa,” kusho u-Olivier.
Imantshi ithe uMalema wayazi ukuthi lesi senzo siphambene nomthetho. Uthe uyazi ukuthi kuyingozi futhi kungalimaza abantu.
“Umsolwa wayazi ukuthi kungalimala abantu noma impahla kodwa waqhubeka,” usho kanje.
Inkantolo igwebe uMalema iminyaka emihlanu ebhadla ejele ngecala lokuqala. Ugwetshwe iminyaka emibili ejele ngecala lesibili.
Uphinde wathola inhlawulo ka-R20 000 noma izinyanga eziyisithupha ejele ngamanye amacala amathathu.
Zonke izigwebo uzozidonsa kanye kanye. Lokhu kusho ukuthi uMalema uzodonsa iminyaka emihlanu ejele.
Ithimba labameli bakhe lithe lizofaka isicelo sokubuyekezwa kwesinqumo senkantolo eNkantolo eNkulu yase-Eastern Cape eMakhanda.
Osesithombeni esingenhla: UJulius Malema ngesikhathi egwetshwa eNkantolo yesiFunda e-East London lapho athola khona iminyaka emihlanu ejele.
Umthombo wesithombe: Sithunyelwe