Lubhalwe nguDoreen Mokgolo
Imeya yase-Ekurhuleni, uMnuz Sivuyile Ngodwana we-African Independent Congress (AIC) ikhala ngokukhashelwa yi-ANC ngemuva kokuvotelwa ukuthi iphume esikhundleni ngoLwesine.
I-ANC ne-DA zihoxile esiphakamisweni sokungabethembi ubuholi bakhe.
Lesi siphakamiso sethulwe i-ActionSA, lapho amakhansela angu-47 – okuhlanganisa namalungu e-ANC – engahambisananga nemiyalelo yeqembu lawo , avotela ukuthi kuxoshwe imeya kanti amakhansela angu-32 oningi lawo awe-EFF avotele ukuphikisa lesi siphakamiso.
UNgodwana owaphatha unyaka wonke uthe nakuba kuyilungelo le-ANC lentando yeningi ukugodla ukuvota, uzizwa ekhasheliwe.
“Ngakhethwa i-EFF ne-ANC ukubasiza ukubahlanganisa njengemeya kodwa namuhla [i-ANC] inqume ukuhambisana nesiphakamiso esibekwe amaqembu aphikisayo.
“Ukube bengizonikwa isikhathi esengeziwe bengizokwethula ezinye izinhlelo zami zikamasipala,” kusho yena.
UNobhala Jikelele we-AIC, u-Aubrey Mhlongo uthe i-ANC isimemezele impi ne-AIC futhi izozwa imiphumela esikhathini esizayo.
“Sizizwa sikhashelwe yi-ANC, besithembele ekutheni iqembu lizosinda esinqumweni esisuselwe ebudlelwaneni esibusungule kusukela ngo-2016.
“Sizobashaya lapho okubuhlungu khona kakhulu – i-Ekurhuleni akuwona wodwa umasipala omkhulu lapho esibambisene khona nabo. Nathi sizokwenza into efanayo.
“Okwenzeka lapha kuzothinta umasipala waseGoli. Ngokungafani ne-ANC, engeke yethenjwa futhi edelela imiyalelo yeqembu labo, i-EFF inamathela emiyalweni nasesikhundleni somholi.
“Akukhona okokuqala i-ANC isikhaphela. Benza okufanayo e-Matatiele. Bayiqalile le mpi thina sizoyiqeda,” kuqhuba uMhlongo.
Umholi wekhokhasi ye-ActionSA, uSiyanda Makhubo uthe iqembu lakhe lijabule ngokuthi ekugcineni “imeya ewunodoli” isusiwe esikhundleni.
“Besilokhu simile kwelokuthi lo mbuso ube inhlekelele kusukela ekuqaleni.
“Siyazi ukuthi ikhansela uNgodwana wayengenele ukhetho emele i-ANC ne-EFF ngesikhathi bengakwazanga ukuthola iningi emaqenjini amancane base benquma ukufaka uNgodwana,” esho.
Kulindeleke ukuthi kuvotelwe imeya entsha esikhundleni lingakapheli isonto .
USomlomo womkhandlu uNthabiseng Tshivhenga we-EFF usinde esiphakamisweni sokungabethembi ubuholi bakhe njengoba amakhansela angu-116 okuhlanganisa i-ANC ne-EFF evote ndawonye ukuthi aqhubeke esikhundleni kanti angu-90 afuna aphume.
Esithombeni esingenhla: Owayeyimeya yase-Ekurhuleni uSivuyile Ngodwana.
Umthombo wesithombe: Doreen Mokgolo