Lubhalwe nguZukile Majova
Umhleli Wezepolitiki
Kuvame ukushiwo ukuthi ayikho into efana nesidlo sasemini samahhala.
Kodwa yilokho kanye okulindelwe imfelandawonye ye-ANC, i-Cosatu kanye ne-SA Communist Party njengoba iqembu lilungisa uhlu lwayo lwalabo abangase babe ngamalungu ePhalamende nezishayamthetho zezifundazwe.
Ingqungquthela yohlu lweqembu elibusayo eqhubeka e-Boksburg iyinkundla yempi, lapho amaqembu amaningi anentshisekelo adonselana ezinhlangothini ezahlukene.
Ekugcineni, uhlu lokugcina oluzosebenza ngokombono kaMengameli uCyril Ramaphosa luzoba umphumela wezivumelwano okufinyelelwe kuzo phakathi kwala maqembu asengqungqutheleni ye-ANC.
I-Cosatu iyinyunyana ecebe kunazo zonke futhi enezinsiza ezingcono kakhulu njengomfelandawonye obusayo wezingxenye ezintathu njengoba inamalungu ayizigidi ezingu-2.1 agijima njengamasosha e-ANC ngesikhathi semikhankaso yayo yokhetho.
Umfelandawonye wezinyunyana onamandla awulindele nje kuphela izikhundla kwikhabhinethi nohulumeni kaRamaphosa kodwa ufuna nokushintshwa kwenqubomgomo emkhakheni wezabasebenzi nasezinkampanini zikahulumeni.
I-Cosatu ibicindezela uhulumeni ukuthi angawayeki amalahle kodwa kunalokho alungise iziteshi zakwa-Eskom eziphehla ugesi ngamalahle.
UGwede Mantashe, owake waba usonyunyana owagqugquzelwa amandla ezinyunyana esikhundleni esinamandla sokuba ngusihlalo we-ANC kanye noNgqongqoshe wezokumbiwa phansi kanye nezamandla, nguyena oqhuba izifiso zezinyunyana.
UThulas Nxesi, onguNgqongqoshe wezabaSebenzi, uke waba yingxenye yenyunyana eyajutshwa kuhulumeni ukuqinisekisa ukuthi umbuso uyahambisana nokusekela abasebenzi.
Okuhle akwenze muva nje kubalwa ukukhushulwa kweholo ebeliphansi, ukulunga komthethosivivinywa wombuso neminye imithetho eqinile yezabasebenzi ebigxekwa ngokwenza kube nzima ukuthi amabhizinisi athole abafuna imisebenzi.
I-SACP eyayingenamandla kangako, eyake yabizwa nge-think-tank futhi ihamba phambili kwimfelandowonye, nayo ithole izikhundla ezithile kuhulumeni kaRamaphosa.
UNobhala wayo osekunesikhathi ephethe uBlade Nzimande unguNgqongqoshe wezeMfundo ePhakeme kanti owayengumholi wophiko lwentsha ye-SACP uMnuz Buti Manamela uyiPhini likaNgqongqoshe emnyangweni ofanayo.
Amandla alo mnyango kanye nobukhulu bawo kufaka phakathi ukusatshalaliswa kwemali engu-R47 billion ye-National Student Financial Aid Scheme.
I-ANC inesinqumo sengqungquthela esizoqinisekisa ukuthi uhlu lwayo lokugcina luno-50% wabantu besifazane.
Uphiko lwentsha lwe-ANC nalo lufuna kube khona okubizwa nge-generational mix ePhalamende nakwiziShayamthetho zezifundazwe.
Abantu baseNingizimu Afrika bazobe belindele ngabomvu ukubona ukuthi mangaki amaqabane anamacala okukhwabanisa nemithwalo yenkohlakalo azokwazi ukuzimpintsha ePhalamende nakwiziShayamthetho.
Kuningi okusengcupheni njengoba iholo eliyisisekelo lelungu lesishayamthetho sesifundazwe lifinyelela ku-R1-million, ngaphandle kwemihlomulo efana nezibonelelo zemoto, izindlu, ezokuvakasha, nomakhalekhukhwini.
Amalungu ePhalamende ahola phakathi kuka-R1-million no-R3-million, kuye ngomsebenzi wawo wasePhalamende njengosihlalo wamakomiti amancane ahlukene.
Esithombeni esingenhla: I-Cosatu.
Umthombo wesithombe: ActionSA