Celani Sikhakhane
Kusolwa i-EFF ngokubhidlika kwezingxoxo zomfelandawonye phakathi kwayo ne-IFP kanye ne-ANC eKZN.
I-EFF ibifuna ukunikwa izikhundla zobumeya nezosomlomo komasipala abaningi abaseKZN, okuyisicelo esicike i-IFP nabaholi be-ANC.
“I-EFF ibifuna ukuphatha uMasipala wase-Newcastle ongezinye zezizinda zomnotho eKZN. Kube inhlekelele yingakho i-ANC inqume ukusebenzisana ne-IFP,” kusho omunye umholi ongathandanga ukudalulwa igama.
USihlalo we-EFF esifundazweni, uMnu uVusi Khoza, uzichithile lezi zinsolo. Uthe i-IFP ne-ANC abafuni ukusebenzisana ngoba basaba ukuthi bazodalula izenzo zabo zenkohlakalo komasipala.
“Sifuna ukwazi ukuthi kuwubuxhwanguxhwangu yini uma sifuna ukuthi kuthathwe umhlaba ngaphandle kwesinxephezelo, noma sicela ugesi wamahhala kwabahola impesheni nama-sanitary towels kwabesifazane?” Kusho uKhoza.
“Lawo maqembu abengafuni ukubambisana nathi ngoba engafuni ukuthi i-EFF isondele emandleni ngoba esaba ukuthi izodalula inkohlakalo yawo.
Uthe umfelandawonye we-ANC ne-IFP uwuphawu lokuthi la maqembu womabili ngeke athenjwa ngisho nangowezi-2024.
Uthe uma umkhandlu uqala ukuhlala kuzoba nezimanga eziningi ezingaholela ekutheni kuqokwe amakhansela e-EFF njengezimeya.
“Iningi labamele la maqembu bendawo abeneme neze ngamalungiselelo abo,” kusho uKhoza.