Lubhalwe nguDoreen Mokgolo
Ifuna ukuhlonishwa ngemuva kweminyaka yokusebenza kanzima futhi inandisa mahhala emicimbini ye-EFF. IThembisa Red Devils ingene ezinkundleni zokuxhumana kuleli sonto izama ukuthola ukunakwa ngumholi weqembu, uMnuz Julius Malema.
Futhi umkhankaso walo ubukeka ube nomthelela amalungu alo abebewufisa, okungenzeka ukuthi ufinyelele ezindlebeni zikaMalema.
Kweminye yemicimbi yaleli qembu ka-2019, uMalema walincoma waze wafunga wagomela ukuthi uma i-EFF isithatha izintambo zikamasipala wase-Ekurhuleni, lizobe licula kuyo yonke imicimbi yalo kamasipala.
Ngemuva kwemibuzo ye-Scrolla.Africa yokuthi kungani iqembu linganakwa muva nje, okhulumela i-EFF e-Gauteng uDumisani Baleni uthe leli qembu lizobe licula embuthanweni walo wokhetho eThembisa ngoMgqibelo.
Kungokokuqala ngqa ezinyangeni eziningi ezedlule ukuthi leli qembu elinamalungu ayisishiyagalombili limenywe ukuthi lizonandisa emcimbini we-EFF.
Leli qembu lithi selokhu lanandisa emcimbini we-EFF kusukela ngo-2014 ngaphandle kwesinxephezelo, lithenjiswa ukuthi uma i-EFF seyinesabelomali sabaculi abazonandisa, bazoba ngabokuqala ukuhlomula.
Kuze kube manje, bebengakayitholi inkokhelo futhi yize bebhukhiwe ukunandisa emcimbini wangoMgqibelo, iqembu kade lagcina ukubabhukhela eminye imicimbi.
Engxoxweni abe nayo ne-Scrolla.Africa, umholi weThembisa Red Devils, uKgaogelo Makhubela uthe phambilini bebejwayele ukuhambela izwe lonke benandisa emicimbini ye-EFF.
“Besingagcini ngokucula emicimbini yabo kodwa singamalungu aphelele eqembu abavotele ukuthi bangene ezikhundleni. Silahlekelwe amagigi okunandisa emhlabeni jikelele kanye nakahulumeni ngokuzihlanganisa ne-EFF. Kodwa … kubonakala sengathi sebezikhohliwe izithembiso zabo,” usho kanje.
“Njengoba sebenemali, bamema abanye abaculi futhi [kubonakala sengathi] thina asisekho ezingeni abalidingayo ukuthi singanandisa emicimbini yabo.”
UMakhubela uthe unesiqiniseko sokuthi uMalema ubengazi ukuthi leli qembu alizange limenywe ukuthi linandise emicimbini yakamuva ye-EFF.
“Yilabo abasezikhundleni zobuholi abangasimemi ukuthi sizonandisa, kanti nathi asinawo amandla okufinyelela [kuMalema] ngempatho ebandayo esiyitholayo,” kubeka yena.
Ephendula ngalezi zinsolo, Baleni uthe i-EFF ayilikweleti lutho iqembu ngokunandisa emicimbini ethile.
“Izikhalo ezivezwe yiqembu zimayelana nokungamenywa emicimbini yethu yakamuva,” usho kanje.
“Sizoqinisekisa ukuthi izikhalo zabo ziyabhekelelwa njengoba siwahlonipha kakhulu amaciko nanoma ngubani osembonini yezobuciko. Wonke umuntu owenza okuthile ezinhlelweni zethu uhlale ekhokhelwa.”
Esithombeni esingenhla: IThembisa Red Devils.
Umthombo wesithombe: Sithunyelwe