Lubhalwe nguZukile Majova
Noma ngabe kukhona izinsongo noma azikho, uMengameli uCyril Ramaphosa uyaqhubeka nezinhlelo zokusayina uMthethosivivinywa Ochitshiyelwe Wemithetho Yezemfundo Eyisisekelo (Bela) ube umthetho.
I-DA ayigcinanga ngokuphikisana nezigaba zoMthethosivivinywa kodwa isabise ngokuphuma kuhulumeni wobumbano kazwelonke (GNU) uma uRamaphosa ewusayina.
I-ANC iveze ukuthi lo Mthethosivivinywa uzothuthukisa ukuphathwa kwezikole kanye nomkhakha wezemfundo.
Umholi we-DA uMnuz John Steenhuisen uthe i-DA iyawuphikisa lo Mthethosivivinywa ngoba uphuca izigungu ezilawula izikole amandla okunquma ngenqubomgomo yolimi ezikoleni zikahulumeni.
I-DA, eyilungu elibalulekile ku-GNU ngamavoti angu-22%, ithe ukusayina uMthethosivivinywa kuzokwephula zombili izibopho zencwadi nomoya weSitatimende Senhloso esihlanganyelwe esazala i-GNU.
Ngaphambi kokuthatha isinqumo ngesinyathelo sakhe esilandelayo, uSteenhuisen uhlele ukuhlangana noRamaphosa ukuze aphikise lesi sinqumo ngomzuzu wokugcina.
Khonamanjalo ngoLwesithathu, umkhulumeli kaRamaphosa uVincent Magwenya uthe asikho isizathu esiqinile sokuguqula umqondo kamengameli ngalesi sikhathi.
IHhovisi likaMengameli lixwayise amalungu e-GNU ukuthi ayeke ukusabisa uzinzo lukaHulumeni waseNingizimu Afrika njalo uma enokungaboni ngaso linye ngodaba oluthile.
“Ngesikhathi kunezingxoxo, i-DA ikubeke kwacaca ukuthi uMthethosivivinywa we-Bela awemukelekile kithina ngendlela oyiyo njengamanje, ngoba unomthelela kuMthethosisekelo welungelo lokufunda ngolimi lwebele, phakathi kwezinye izinto,” kusho uSteenhuisen.
“I-DA inxuse uMengameli uRamaphosa ukuthi abuyisele lo Mthethosivivinywa ePhalamende ukuze kwenziwe izichibiyelo ezimbalwa ukuze uhambisane noMthethosisekelo.”
Lo mholi we-DA uthe sekuyisikhathi sokuthi abayingxenye ye-GNU basungule indlela yokuxazulula izingxabano ukuze i-ANC iqonde ukuthi ngeke isakwazi ukuthatha izinqumo yodwa.
“Uma umengameli eqhubeka nokungazilaleli izikhalo zethu kusho ukuthi ubeka engcupheni ikusasa likahulumeni wobumbano lwesizwe, futhi ucekela phansi umbono omuhle okwakhelwe phezu kwawo.
“I-DA ilubheka njengento ebaluleke kakhulu lolu daba, futhi ngizotshela umengameli ngomthelela omubi olenza ngekusasa le-GNU,” kusho uSteenhuisen.
Esithombeni ngenhla: Umholi we-DA uJohn Steenhuisen kanye noMengameli uCyril Ramaphosa.
Umthombo: iol.com