I-City ishaye i-Foxes ukuze isondele ekutholeni isicoco

Timmy T Maranda

Ukunqoba kane emidlalweni elandelayo kuzokwanela ukunqoba isicoco se-Premier League.

Lokhu kushiwo nguPep Guardiola ku-akhawunti ye-Manchester City ku-Twitter ngemuva kokuba iqembu lakhe linqobe ngamagoli amabili eqandeni lidlala ne-Leicester City ngoMgqibelo e-King Power Stadium.

Uncome ukungaguquguquki kwabadlali.

“Ngenxa yemidlalo esiyiwinile ngenyanga edlule – ngijabule kakhulu,” esho.

Amagoli amabili esiwombe sesibili, elokuqala elikaBenjamin Mendy bese kuba ngelikaGabriel Jesus, anikeze i-Citizens ukunqoba futhi avule igebe lamaphuzu ayi-17 phezulu etafuleni.

Iqembu lihlanganise isikhundla salo phezulu etafuleni ukuze lihambe phakathi kwamaphuzu ayi-11 ngesicoco sesithathu se-Premier League eminyakeni emine.

Kubeyimpindiselo emnandi ku-Citizens eyahlulwa ngamagoli amahlanu kwamabili ku-Foxes emdlalweni obuyela emuva ngoMandulo ngonyaka odlule e-Etihad Stadium.

UGuardiola ubabaze ukubekezela okukhonjiswe ngabadlali bebhekene ne-Leicester City enenkani kakhulu uma iqhathaniswa nesikhathi esedlule.

“Besibekezele kakhulu kunomdlalo obuse-Etihad. Kumele ubekezele uma uqhathwa ne-Leicester ngoba bavikela kahle kakhulu,” esho.

“Abadlali bagijima kakhulu futhi balwa kuyo yonke imidlalo futhi yinto engiziqhenya ngayo kakhulu,” kusho uGuardiola.

Umdlalo wabo olandelayo we-UEFA Champions League ne-Borussia Dortmund uzoba ngoLwesibili ebusuku e-Etihad. Umdlalo uzoqala ngo-21:00.

Umthombo wesithombe: @Manchestercity