Lubhalwe nguCelani Sikhakhane
Amaphoyisa KwaZulu-Natal asexwayise osomabhizinisi abaqasha abokufika abangenazo izincwadi ukuthi bangalindeli ukuvikelwa ngamaphoyisa uma bephula umthetho.
- Amaphoyisa KwaZulu-Natal atshele osomabhizinisi ukuthi izinkampani eziqasha abokufika abangenazo izincwadi zephula umthetho futhi zingase zivalwe.
- Amaphoyisa athi azovikela imibhikisho enokuthula yangomhlaka-30 kuNhlangulana kodwa azothathela izinyathelo noma ngubani obandakanyeka kudlame, ukusabisa noma kwezinye izenzo zobugebengu.
Amaphoyisa aKwaZulu-Natal asethumele isexwayiso esiqinile kosomabhizinisi abaqasha abokufika abangenazo izincwadi.
Bathi izinkampani ezephula imithetho yokungena kwabokufika akumele zilindele ukuvikelwa ngamaphoyisa uma kuvela izinkinga.
Lesi sexwayiso sikhishwe emhlanganweni obuphakathi kwezikhulu eziphezulu zeSouth African Police Service namalungu eZululand Chamber of Commerce ngoLwesihlanu.
Amaphoyisa ahlangane nabaholi bamabhizinisi ngaphambi kwemibhikisho kazwelonke ehlelelwe umhlaka-30 kuNhlangulana, lapho kulindeleke ukuthi kube nemibhikisho yamaqembu amelene nokufika kwabantu bakwamanye amazwe ngokungemthetho ezweni lonke.
UMajor General Anthony Gopaul uthe amabhizinisi aneqhaza elikhulu ekukhuliseni umnotho nokudala amathuba emisebenzi.
Uthe amaphoyisa ayaqonda ukuthi osomabhizinisi abaningi bakhathazekile ngemibhikisho ehleliwe, kodwa amaphoyisa akulungele ukuvikela izakhamizi ezithobela umthetho namabhizinisi.
“Siyazi sonke ukuthi umkhakha wezamabhizinisi ubalulekile ekukhuleni komnotho nasekusimameni komnotho esifundazweni,” kusho uGopaul.
“Lesi akusona isikhathi sokuthi amaphoyisa enze izinkulumo, kodwa esokwenza uhlelo lokuvikela izakhamizi zakulesi sifundazwe, impahla yazo, amabhizinisi nengqalasizinda ebalulekile.”
Uthe ukungena kwabantu bakwamanye amazwe ngokungemthetho kusewudaba lokugcinwa komthetho amaphoyisa angeke aluzibe.
Amaphoyisa asevele andise imisebenzi esifundazweni sonke ukuhlonza nokubopha abantu bangaphandle abangenazo izincwadi ukuze badingiswe.
“Kuwumsebenzi oqhubekayo futhi sinxusa imiphakathi ukuthi iqhubeke nokusinika ulwazi mayelana nezindawo okucashe kuzo abokufika abangenazo izincwadi,” usho kanje.
UGopaul uphinde wanxusa osomabhizinisi ukuthi bakhe ubudlelwano bokusebenzisana neziteshi zamaphoyisa zendawo kanye nabakhuzi bezifunda ukuze bakwazi ukusabela ngokushesha uma kudingeka.
Wayenomyalezo oqinile kubaqashi.
“Uma ibhizinisi lakho liqashe abokufika abangenazo izincwadi, livale lelo bhizinisi ngoba uphula umthetho,” usho kanje.
“Ngeke sihlale etafuleni sixoxe ngokuthola amabhizinisi abantu abaphula umthetho.”
Uthe amabhizinisi aqasha abasebenzi ngokusemthethweni nalandela imithetho yaseNingizimu Afrika akumele esabe.
“Uma ibhizinisi lakho limi kahle futhi lingaqashi noma lixhaphaza abantu bangaphandle abangenazo izincwadi, akukho okumele ukhathazeke ngakho,” usho kanje.
UGopaul uqinisekise osomabhizinisi ukuthi iRichards Bay nezinye izindawo ezibalulekile kwezomnotho zizovikeleka kakhulu ngesikhathi kuqhubeka imibhikisho.
“Ukuphepha kuqinisekisiwe ngomhkaka-30 kuNhlangulana ka-2026 nangale kwalokho,” esho.
Lo mhlangano ubuhanjelwe yiPhini likaNgqongqoshe wezeMfundo ePhakeme nokuqeqesha uDkt Nomusa Dube-Ncube, iPhini likaNgqongqoshe wezokuQashwa naBasebenzi uJomo Sibiya, nezikhulu eziphezulu nezimenenja eziphezulu ezinkampanini ezingaphansi kwesiFunda iKing Cetshwayo.
Amaphoyisa aphinde ahlangana nabahleli bomkhankaso weMarch and March, okuyiwona ohola imibhikisho ezweni lonke.
Amaphoyisa KwaZulu-Natal athe ngeke amise imibhikisho esemthethweni kodwa azoqinisekisa ukuthi ihlala inokuthula futhi ihambisana nomthetho.
Kuzwelonke, amaphoyisa ahoxise ikhefu lamaphoyisa amaningi futhi akhuphula ezokuphepha ngaphambi kwemibhikisho njengoba iziphathimandla zilungiselela imibhikisho engase ibe khona ezifundazweni eziningi.
Esithombeni esingenhla: UMajor General Anthony Gopaul ukhuluma nabaholi bamabhizinisi mayelana nokufika kwabantu bakwamanye amazwe ngokungemthetho kanye nokuphepha ngaphambi kwemibhikisho yangomhlaka-30 kuNhlangulana.
Umthombo wesithombe: KwaZulu-Natal South African Police Service