Lubhalwe ngu-Anita Dangazele
I-SAPS ithi izovikela ilungelo lokumasha ngokuthula ngomhlaka-30 kuNhlangulana ka-2026, ngemva kokubopha abantu abangu-15,384 ezweni lonke emkhankasweni wesonto lonke.
Kulaba ababoshiwe kubalwa abokufika abangu-2,884, abasolwa ngokubulala abangu-146 kanye nowesifazane obanjwe esikhumulweni sezindiza i-OR Tambo nezinhlamvu ezingu-28 okusolwa ukuthi yi-cocaine emzimbeni wakhe.
Kusasa kulindeleke ukuthi izinkulungwane zabantu baseNingizimu Afrika bagcwale imigwaqo emadolobheni akuleli zwe bebhikishela ukungena kwabantu bakwamanye amazwe ngokungemthetho. Ezinsukwini eziyisikhombisa ngaphambi kwaleyo mashi, amaphoyisa asevele enza umnyakazo.
Phakathi kuka-22 no-28 kuNhlangulana ka-2026, uMbutho Wamaphoyisa aseNingizimu Afrika wabopha abantu abangu-15,384 ngesikhathi somkhankaso weShanela II ezweni lonke. Phakathi kwabo bekukhona abokufika abangu-2 884 ababoshelwe ukwephula umthetho we-Immigration Act, abasolwa abangu-146 bamacala okubulala kanye nabangu-136 ababoshelwe ukuzama ukubulala.
Amaphoyisa aphinde abopha abantu abangu-111 ngamacala okudlwengula ashaqa nezibhamu ezingu-101 ezingekho emthethweni.
Ibamba likaKhomishana kaZwelonke uLieutenant General Puleng Dimpane uthe i-SAPS izovikela ilungelo elikumthethosisekelo lokubhikisha ngokuthula kuyilapho igcina bonke abantu baseNingizimu Afrika bephephile.
Imisebenzi yadlulela ngale kwabokufika. NgoLwesihlanu ngomhlaka-26 kuNhlangulana ka-2026, owesifazane waseNingizimu Afrika oneminyaka engu-23 ubudala waboshwa esikhumulweni sezindiza i-OR Tambo International ngamacala okushushumbisa izidakamizwa. Wayesendleleni eya eTokyo, eJapan, lapho amaphoyisa emmisa. Ngesikhathi sesitatimende se-SAPS, ubesekhiphe izinto ezingu-28 ezifana nezinhlamvu okusolakala ukuthi zine-cocaine. Inani lemithi belingakaqinisekiswa.
EBeitbridge Port of Entry, iBorder Management Authority ibambe owesilisa waseMalawi obegibele ibhasi esuka eMalawi nama-explosive cables emali elinganiselwa ku-R100,000 efihlwe phakathi kwesaka lerayisi. Kubizwe oKlebe kanye nophiko lokuchithwa kwamabhomu e-SAPS. Umsolwa uvalelwe esiteshini samaphoyisa eMusina, eLimpopo.
Uphenyo lokuthi amakhebuli abeyaphi nokuthi athunywe ngubani luyaqhubeka.
EThekwini, amaphoyisa avale imigwaqo endaweni yasePhoyinti ngomhlaka-20 kuNhlangulana ka-2026, evala amabhizinisi atholakala esebenza ngaphandle kwezimvume futhi evalela abokufika ukuze bahlolwe.
Amaphoyisa e-SAPS athe umkhankaso waseThekwini nawo wenzelwe ukukhombisa ukuthi amaphoyisa KwaZulu-Natal ami ngomumo ukugcina ukuthula ngesikhathi semashi yakusasa.
Esithombeni esingenhla: Amaphoyisa aseNingizimu Afrika aqhuba imikhankaso yokumisa beseshe ngaphambi kwemibhikisho kazwelonke yomhlaka-30 kuNhlangulana ka-2026.
Umthombo wesithombe: SAPS