AKE SITHOLE I-JAB, NINGIZIMU AFRIKA!

Everson Luhanga

Bantu baseNingizimu Afrika, umuthi wokugoma ukhona. Ake sithole i-jab!

UMengameli uCyril Ramaphosa ubesesikhumulweni sezindiza ukwamukela ukuthunyelwa kokuqala kwemithi yokugoma ayichaze “njengengqophamlando enkulu.” Iqoqo lokuqala lihlelelwe ukuhlomulisa abasebenzi bezempilo.

Yize kunabantu abanqikaza ukugoma, abantu abaningi baseNingizimu Afrika abakwazi ukulinda ukuthola ithuba lokuthola amasosha omzimba abawadingayo kulesi sitha esingabonakali.

ULindiwe Mahlangu wasedolobheni elingaphakathi eGoli uthe kuyimpumuzo enkulu ukuzwa nje ukuthi umuthi wokugoma ufike ezweni lethu.

“Abantu abalahlekelwe yizihlobo zabo bebengalithanda leli thuba lokuthi bagonywe abathandekayo babo.”

Uthe kwephula inhliziyo yakhe ukubona abantu bekhuluma ngokungayitholi imijovo yokugoma, benemibono engenabufakazi yokuthi lo mgomo ungaba yingozi kubo. “Impela, abantu abanjalo abalahlekelwanga muntu osondelene nabo ngenxa ye-Covid-19. Leli gciwane liyabulala. Sidinga konke ukuzivikela komzimba esingakuthola. Okungenani uhulumeni wethu ubesebenza kanzima ukuthola lo mgomo,” kusho uLindiwe.

Omunye wabasolayo nguVincent Ndima wase-Alexandra eGoli othe uyangabaza ukuthi uzowuthatha lo mgomo. “Siyatshelwa futhi sikhuthazwa kuphela ukuthi siphuze umuthi wokugoma ngaphandle kokwazi okuningi ngemiphumela yawo emibi.

“Nginemibuzo eminingi uhulumeni okumele ayiphendule kwizakhamizi ezijwayelekile ngokuthi kuzosebenza kanjani konke,” kusho uVincent.

Amagama kaVincent okungabaza aphikiswa yingoma nomdlandla onamandla womculo owaziwa umhlaba wonke iNdlovu Youth Choir ngengoma ethi Jaba jaba. Le ngoma ikhuthaza abantu baseNingizimu Afrika ukuthi bagonywe ukuze banqobe leli gciwane.

I-Nandos nayo ibhale isikhangiso esigxeka imibono yetulo ngemigomo.

“Uhulumeni akazami ukufaka ama-chips kuwe. Kodwa thina senzanjalo,” kufundeka kwisikhangiso.

Abakwa-Scrolla.Africa bakhulume noDkt u-Angelique Coetzee obambe iqhaza ekutheni odokotela abazimele bagonywe ngokubambisana noMnyango Wezempilo Kazwelonke waseNingizimu Afrika kanye nezifundazwe egameni le-South African Medical Association (i-SAMA).

“Okokuqala abagonyayo kudingeka bagonywe bese kumele silinde ukuthi amasosha omzimba abo aqale ukusebenza, bese beqala ukugoma abasebenzi bezempilo,” kusho uDkt uCoetzee.

URamaphosa wengeze ngoMsombuluko ebusuku wathi: “Kukithi ukuthi sigonywe ngokushesha uma sekufanelekile futhi sinqande leli gciwane ukusabalala kakhulu.”

Ividiyo: @ChoirAfrica