Lubhalwe nguCelani Sikhakhane
Sekuvele ukuthi abaholi bakaKhongolose KwaZulu-Natal bahluleka ngisho sebecele iNgonyama uMswati iii ukuba abancengele iSilo uMisuzulu kaZwelithini ukuba aqoke uDkt Zweli Mkhize ukuba uNdunankulu kaZulu.
Kuthiwa iNdlulamithi yanele yezwa lokho yahlangana nabakwabo nokuyilapho okwabhungwa khona ngegama likaMntwana uZuzifa kaMangosuthu Buthelezi ukuthi kube nguye oqokwayo.
Imithombo eseNdlunkulu ixoxele i-Scrolla.Africa ukuthi iNdlulamithi yakhala ngokuthi ayikwazi ukuqoka uKhabazela ngoba ifuna umuntu osemusha nezokwazi ukumthuma.
“INdlulamithi yenqaba impela yakhala nangokuthi bafuna ukuyilawula ukuba iqoke bani kulesi sihlalo. Ngesikhathi kuyiwa eSandlwana sasibheke uMntwana uZuzifa njengoba ayefakwe ngisho ohlelweni ukuba ethule iSilo njengoba ayehlaliswe eduze kwaso.
“Kodwa-ke, sethuka uma sekumenyezelwa uMfundisi uThulasizwe Buthelezi. Lokho kwabacika abaholi bakaKhongolose kuHulumeni ngoba omunye nje wesifazane omkhulu kuhulumeni wesifundazwe washaya ucingo ntambama sekubuywa eSandlwana elwisa iSilo, esithethisa ukuthi simqokeleni uButhelezi ngoba bekumele sibuze kubo ukuthi ubani esingamqoka. Hheyi wathetha loya nkosikazi,” kusho omunye wabaNtwana.
Uthe iSilo samtshela ukuthi phela isihlalo sikaZulu asibiki kuHulumeni ngezinqumo zaso.
Uqhube wathi iSilo samtshela lo mholi wesifazane ukuthi siyamangala ukuthi olwani ulaka olungaka ngoba siqoke uMfundisi uThulasizwe Buthelezi we-IFP, saqoka nomuntu kaKhongolose obuya ekudingisweni okuyiNkosi uPhathisizwe Chiliza njengephini likaNdunankulu wesizwe.
Umthombo uqhube wathi kukhona nabanye abaholi abafika ngqo kuyo iNdlulamithi bezocelela owayenguMengameli uJacob Zuma ukuba kuqokwe yena.
“Laphoke iSilo sabachazela ukuthi uMsholozi usemdala ngakho simuthatha njengoyise. Ngakho asithandi ukuba sibuyele esimweni lapho besinoMntwana wakwaPhindangene ebesimhlonipha sisaba nokumthuma.
“Sathi kulesi sikhundla sidinga umuntu osemncane esizokwazi ukumthuma emisebenzini yesizwe ngaphandle kokusaba,” kusho umthombo.
Okhulumela uKhongolose KwaZulu-Natal uMnuz Mafika Mndebele ubhoke ngolaka wathi amanga aluhlaza lawo.
“Uyabona-ke amanga aluhlaza lawo. Ngiyakutshela ngithi amanga futhi ngicela ungangifaki kulawo manga,” kusho uMndebele.
UNdunankulu kaZulu obuye aphathe ezokuxhumana eNdlunkulu, uMfundisi uThulasizwe Buthelezi akazange atholakale ukuze aphawule ngalolu daba.
Ucingo lwakhe belulokhu lukhale njalo kodwa lungabanjwa.